Հայաստան այցի նախօրէին նախագահը խորհրդակցութիւն է անցկացրել Երեւանի եւ Բաքւի միջեւ համաձայնագրի թեմայով
«ԱԼԻՔ» – Հանրապետութեան նախագահ Մասուդ Փեզեշքիանը յայտարարել է, որ իր այցերը Հայաստան եւ Բելառուս ուղղւած կը լինեն իրանական մասնաւոր ընկերութիւնների դերի բարձրացմանը եւ նախկինում ձեռք բերւած պայմանաւորւածութիւնների, մասնաւորապէս՝ համատեղ ներդրումային նախագծերի առաջխաղացմանը: Հաղորդում է «Մեհր» լրատւական գործակալութիւնը՝ յղում կատարելով նախագահի պաշտօնական կայքին:
Փեզեշքիանն այս յայտարարութիւնն արել է երէկ՝ օգոստոսի 17-ին, Հայաստանի եւ Բելառուսի հետ Իրանի յարաբերութիւնների քննարկման թեմայով բարձրաստիճան պաշտօնեաների հետ հանդիպման ժամանակ:
Ըստ լրատւութեան՝ քննարկումները կենտրոնացած են եղել առանցքային, այդ թւում՝ էներգետիկայի, տրանսպորտի, առեւտրի, ներդրումների, առողջապահութեան, շրջակայ միջավայրի, գիտութեան, մշակոյթի եւ զբօսաշրջութեան ոլորտներում հնարաւոր համագործակցութեան վրայ։ Քննարկման մասնակիցները սահմանել են համագործակցութեան հիմնական խնդիրներն ու հնարաւորութիւնները եւ քննարկել դրանց լուծման ռազմավարութիւնները։
Դիտարկւել է նաեւ Հայաստանի եւ Ադրբեջանի միջեւ տրանսպորտային միջանցքի մասին վերջին համաձայնագիրը՝ շեշտադրելով Իրանի ազգային շահերի պաշտպանութիւնը։
Հանդիպմանը քննարկւել են նաեւ Իրանի եւ Հայաստանի, ինչպէս նաեւ Իրանի եւ Բելառուսի միջեւ համագործակցութեան առաջիկայ համաձայնագրերն ու յուշագրերը՝ ուղղւած դրանց ժամանակին իրականացմանը։
Հանրապետութեան նախագահը վերահաստատել է Իրանի յանձնառութիւնը տարածաշրջանային համագործակցութեան ընդլայնմանը եւ հարեւան երկրների հետ կապերի ամրապնդմանը՝ կառուցողական փոխգործակցութեան եւ փոխադարձ շահի հիման վրայ։
