«Հայաստան» խմբակցութիւն. «ԵՄ անդամութեան յայտի հարցով լսումների նպատակը հանրութեանը իշխանութեան հեռացման օրակարգից շեղելն է»
«ԱԼԻՔ» – Յունիսի 21-ին ՀՀ ԱԺ-ում Հայաստանի` ԵՄ անդամակցութեան յայտ ներկայացնելու հարցով հանրաքւէ անցկացնելու թեմայով լսումների առիթով, ՀՀ ԱԺ «Հայաստան» խմբակցութիւնը հանդէս է եկել յայտարարութեամբ.
«ԱԺ-ում ընդդիմադիր ֆրակցիաների կողմից հրաւիրւած «Կառավարութեան հրաժարականի եւ նոր կառավարութիւն ձեւաւորելու անհրաժեշտութեան մասին» թեմայով արտահերթ նիստին ՔՊ-ն, հերթական անգամ խախտելով Սահմանադրութիւնը, հրաժարւեց մասնակցել, փոխարէնը ԱԺ քննարկման օրակարգ բերեց «Հայաստանի՝ Եւրոմիութեանն անդամակցութեան յայտ ներկայացնելու հարցով հանրաքւէ անցկացնելու առաջարկի շուրջ» լսումներ անցկացնելու հարցը:
Մեր կարծիքով, այս հարցը ներկայումս օրակարգ բերելը խիստ արհեստական է, աշխարհաքաղաքական իրողութիւններից կտրւած եւ ներքաղաքական իմաստով՝ կեղծ։ Այն նպատակ ունի շեղել հանրութեան ուշադրութիւնը գործող իշխանութիւնների հեռացման իրական օրակարգից:
Կարծում ենք, որ իշխանութիւնների կողմից այս օրակարգն առաջ բերելու իրական նպատակը Սահմանադրութեան փոփոխութեան հանրաքւէի անցկացման հարցն է, որը կարող է զուգորդւել Հայաստանի՝ Եւրոմիութեանն անդամակցութեան յայտ ներկայացնելու հարցի վերաբերեալ հանրաքւէով: Սա արւում է այն պարզ պատճառով, որ ԵՄ անդամակցութեան քողի տակ անցկացւող Սահմանադրութեան փոփոխութիւններով բաւարարեն թուրք-ադրբեջանական հերթական պահանջը։
Իշխանութիւնները եւ նախագծի հեղինակները նախեւառաջ պէտք է ազնւօրէն հանրութեանը իրազեկեն եւ պատասխանեն հետեւեալ հարցին՝ արդեօք ՀՀ-ն պէ՞տք է դուրս գայ ԵԱՏՄ-ից՝ հաշւի առնելով, որ ԵՄ-ն առաջին հերթին մաքսային միութիւն է։ Նկատի ունենալով ՀՀ ձեւաւորւած առեւտրատնտեսական յարաբերութիւնները, տնտեսութեան եւ արտաքին առեւտրի կառուցւածքը, նման քայլը կարող է խիստ վնասակար լինել Հայաստանի տնտեսութեան համար:
ԵՄ անդամակցութեան հարցը կարող է լուծւել բացառապէս ԵՄ-Հայաստան բանակցութիւններում ձեռք բերւած համապատասխան փոխադարձ համաձայնութիւնների միջոցով։ Հանրաքւէի միջոցով անդամակցութեան յայտ ներկայացնելու վերաբերեալ ԵՄ կողմից դրական արձագանգի հնարաւոր բացակայութիւնը լրջագոյն հարւած կը լինի երկրի հեղինակութեանը։ Պատահական չէ, որ ԵՄ անդամակցութեան թեկնածու ԱՊՀ նախկին պետութիւնները՝ Ուկրաինան, Մոլդովան, Վրաստանը, յայտ ներկայացնելու համար հանրաքւէներ չեն անցկացրել։
Այսօրինակ նախաձեռնութիւններով իշխանութիւնը շարունակելու է պառակտումը հասարակութեան մէջ՝ բերելով նոր բաժանումների՝ հակառուսական, հակաեւրոպական պիտակավորումներով»,- ասւած է հրապարարակւած յայտարարութեան մէջ:
