Վարդան Օսկանեան. «Ադրբեջանի պահանջով 4 խնդիր է դրւել Փաշինեանի առջեւ»
«ԱԼԻՔ»-Փաշինեանն իր դիւանագիտական, քաղաքական, ռազմաքաղաքական կատարեալ անմեղսունակութեան արդիւնքում ստեղծել է այս վիճակը եւ կորցրել ենք Ղարաբաղը: Այս մասին ֆէյսբուքեան տեսաուղերձում ասել է ՀՀ նախկին ԱԳ նախարար Վարդան Օսկանեանը:
«Հիմա Փաշինեանն ուզում է մէկընդմիշտ այս հարցը փակել եւ հանել մեր յիշողութիւնից։ Դրա համար նրա առջեւ 4 խնդիր կայ դրւած: Առաջինը փոխել Հայաստանի Սահմանադրութիւնը, երկրորդը՝ միջազգային դատական ատեաններից յետ կանչել բոլոր հայցերը, երրորդը՝ Մինսկի խմբի չեղարկումն է, չորրորդը՝ այնքան վատթարացնել արցախցիների վիճակը, որ լքեն Հայաստանը»,- ասել է Օսկանեանը:
Նախկին արտգործնախարարի խօսքով, այս ամէնի մասին նաեւ բացայայտ Փաշինեանն ու Կառավարութեան անդամներն են խօսում. «Մենք պիտի թոյլ չտանք, որ Արցախի հարցը փակւի, եւ պիտի ցոյց տանք եւ իշխանութիւններին, եւ միջազգային հանրութեանը, որ մեզ համար Արցախի հարցը փակւած չէ եւ արցախահայութիւնը պէտք է վերադառնայ իր հայրենիքը, վերականգնի իր իրաւունքները»:
