Տիգրան Աբրահամեան. «Խնդիրը ոչ թէ այն է, թէ արդեօք դուք կարողանալու էք պահել իշխանութիւնը, այլ այն, թէ ինչ գին է վճարում երկիրը»
«ԱԼԻՔ» – Կառավարութիւնն ու նրա ղեկավարը պէտք է փոխւեն: Այս մասին երէկ՝ յունիսի 11-ին, ՀՀ ԱԺ-ում յայտարարութիւնների ժամին ասել է «Պատիւ ունեմ» խմբակցութեան պատգամաւոր Տիգրան Աբրահամեանը։
«Սա ոչ թէ զուտ ընդդիմադիր խմբակցութիւների դիրքորոշումը կամ ցանկութիւնն է, այլ այն, որ դո՛ւք՝ իշխանութիւններդ, հասարակութեանը՝ կառավարութեան եւ նախընտրական ծրագրերով խոստացած ապագայի հեռանկարը ուղարկել էք աղբանոց:
Հասարակութիւնն ընդամէնը ընդդիմադիր ուժերի միջոցով հանրայնացնում է իր տրամադրութիւններն ու ձեւակերպում հանրային պահանջը՝ կառավարութեան ու իշխող ուժի նկատմամբ անվստահութեան եւ հրաժարականի վերաբերեալ:
Այստեղ խնդիրը միայն այս կամ այն հրապարակում հաւաքւած մարդկանց թիւը չէ, որը իշխանական քարոզչամեքենան այդքան շահարկում եւ մանիպուլացնում է, ոչ էլ առաւել եւս այն կեղծ իրականութիւնը, որը նաեւ այս ամբիոնից էք փորձում ստեղծել ու միաժամանակ ծաղրանքի կամ հեգնանքի ենթարկել։
Համոզւած եմ, որ դո՛ւք կամ ձեզանից ոմանք, ոչ միայն գիտակցում են Հայաստանում ստեղծւած ծայրայեղ տագնապալից իրադարձութիւնների քաղաքական պատասխանատւութեան հարցը, այլ տիրապետում են իշխանութեան նկատմամբ հանրային իրական տրամադրութիւններին եւ ցանկութիւններին:
Խնդիրը ոչ թէ այն է, թէ արդեօք դո՛ւք կարողացել էք կամ կարողանալու էք պահել իշխանութիւնը, այլ այն, թէ ինչ գին է վճարում երկիրը ձեր արկածախնդրութեան եւ սեփական ժողովրդի նկատմամբ թշնամական գործողութիւններ իրականացնելու պատճառով:
Աւելին՝ որոշներդ էլ գիտէք, թէ ի՞նչ ծանր պատասխանատւութեան տակ էք մտել եւ դա ինչ անկանխատեսելի հետեւանքներ է ունենալու:
Միայն առաջին հայեացքից ձեզ կարող է թւալ, որ մարդկանց անընդհատ ահաբեկելով, բռնութիւն գործադրելով, ազատազրկելով ինքնափրկութեամբ կամ իշխանութեան պահպանմամբ էք զբաղւած, որովհետեւ ձեր իսկ ստեղծած տուրբուլենտ իրականութիւնը՝ մի փուլում, ձեր եւ ձեր կառավարութեան անխուսափելի քաղաքական վախճանին է բերելու, աւելի ճիշտ՝ դրա վաւերացումն է ապահովելու:
Որքան էլ ինքնախաբէութեան համար շարունակ գոռաք լեգիտիմ, ինքնիշխան, աննախադէպ բառերը, նախադասութեան մէջ դրանց տեղերն ինչպէս էլ փոխէք, մէկ է՝ իրականութիւնից փախուստ ձեւակերպել չի յաջողւելու»,- ասել է Տիգրան Աբրահամեանը։
Նրա խօսքով՝ քաղաքական գործընթացներն ու պետութեան կառավարման առաքելութիւնը «լկտիութեան, անպատկառութեան, անբարոյականութեան հետ խառնելը ձեզ չի՛ ազատում քաղաքական, մարդկային, հոգեւոր պատասխանատւութիւնից»:
«Կոնկրետ քաղաքական գործիչների վատաբարոյ, լկտի, գռեհիկ վարքագիծը խօսում է ոչ միայն իրենց իսկ տեսակի, չմարդու կերպարի ու դատարկաբանութեան, այլ սեփական շեֆերին անսահման քծնելու եւ ստորաքարշութեան մասին ու այդ ամէնը Փաշինեանի, մանդատի եւ բերետի յետեւից»,- նշել է նա։
