Ապագայ ընտրութիւններում յաղթող ուժերը

ՎԱՀԷ ՅՈՎՀԱՆՆԻՍԵԱՆ

«Այլընտանքային» նախգծեր խումբ

 

Առաջիկայ խորհրդարանական ընտրութիւնները (հերթական թէ արտահերթ) աչքի են ընկնելու անսպասելի, անհաւանական դաշինքներով ու միաւորումներով։ Դա գալիք ընտրութիւնների սուր առանձնայատկութիւնն է լինելու։

Յաջողութեան են հասնելու այն ուժերը, միաւորները, ովքեր հայ ժողովրդին ասելիք կունենան։ Ոչ թէ բարձրագոչ խոստումներ ու գեղեցիկ լոզունգներ, այլ ասելիք, որն արագ կարող է վերածւել անելիքի՝ այսօրւայ մեր իրավիճակին համարժէք։ Յաջողութեան բանաձեւն է՝ ճիշտ բովանդակութիւն եւ ճիշտ դէմքեր։ Ապագան նրանցն է, ովքեր կը գան Հայաստանի յետպատերազմեան վերականգնման իրատեսական փաթեթով։

Նրանք, ովքեր կունենան ռացիոնալ ասելիք եւ հասարակութեան հետ աշխատելու մտածւած ստրատեգիա, ունենալու են յաջողութիւն։ Եւ ականատեսն ենք լինելու ամենատարբեր կոալիցիաների, համագործակցութեան ձեւաչափերի, որովհետեւ լինելու է «ասելիքների», մտաւոր պոտենցիալի կենտրոնացման անհրաժեշտութիւն։

Պէտք է դուրս գալ. «Ժողովուրդը լիդեր է սպասում, որ յետեւից գնայ» թակարդից։ Դա ոչ միայն խաբկանք է, այլեւ այսօր ժողովուրդը կարող է (եւ պատրաստ է) յօշոտել ցանկացած պոտենցիալ լիդերի։ Ժողովուրդը բովանդակութիւն եւ իրական ապագայ է սպասում։

Միֆական լիդերը, մինչեւ վերջ գնալը, «մահապարտ լինելը», անձնազոհութեան խոստումը յարաբերական հասկացութիւններ են։ Ամէն ինչ տեսել ենք։

Հասարակութեան այս վիճակը «ընտրում» է Նիկոլ կամ անտարբերութիւն։ Իշխանութիւն փոխելու համար պէտք է հասնել հասարակական տրամադրութիւնների փոփոխութեան։ Սա հնարաւոր է միայն նոր բան առաջարկելով ու մարդկանց հետ ճիշտ հաղորդակցութիւն կառուցելով։ Կոտրւած, պարտւած ժողովուրդներին պէտք է ցոյց տալ ապահովութեան, արժանապատւութեան, հանդարտութեան օդը։ Իսկ սրան հասնելու համար պէտք է.

ա. Ապահովել ճիշտ բովանդակութիւն եւ ճիշտ դէմքեր,

բ. Կազմակերպել համակարգւած աշխատանք, թիմեր,

գ. Ներդնել անհրաժեշտ ռեսուրս,

դ. Գտնել իշխանութեան ընտրական թէզերի հակաթոյնը։ Դա ունիւերսալ լուծում չէ, եւ ամէն ոչ իշխանական միաւոր դա պէտք է անի իր հիմնական բովանդակութեանը՝ դիրքաւորմանը համահունչ։

Այս ընտրութիւնները նաեւ առանձնայատուկ են լինելու նրանով, որ քաղաքական դաշտում կայ իրական քաղաքական եւ որակական սերնդափոխութեան հնարաւորութիւն։ Վերջին տարիներին հանրային դաշտում յայտնւել են բազմաթիւ նոր դէմքեր, որոնք վաստակել են նոր քաղաքական ուժեր, միաւորներ ձեւաւորելու եւ պայքարին մասնակցելու, իրական սերնդափոխութիւն իրականացնելու իրաւունքը։ Նրանք կարող են յաջողութիւն ունենալ, քանի որ հասցրել են թրծւել նոր իրականութեան մէջ, տիրապետում են հանրային իրական տրամադրութիւններին եւ ունեն առողջ մղումներ։

Այս ամէնը կարող է իրօք փոխել հասարակական տրամադրութիւնները։ Այս պրոցեսի համար պէտք են մոդերատորներ, ոչ թէ՝ մէկ լիդեր։ Պէտք են մոդերատորներ, ովքեր կը փորձեն միաւորել թիմեր եւ գաղափարներ։ Լիդերներ փնտրելու, յօրինելու, վերակենդանացնելու փոխարէն պէտք է գործել այս ուղղութեամբ։ Եւ այս ճանապարհին համայնքային ընտրութիւններում (օրինակ՝ Գիւմրիում եւ այլուր) կարելի է ձգտել նոր համատեղ ֆորմատների։ Փորձարկել համատեղ աշխատանքի մշակոյթը։

Եւ վերջապէս, առաջիկայ խորհրդարանական ընտրութիւններն ունենալու են վտանգաւոր առանձնայատկութիւն. արտաքին գործօնը։ Սա մեր այսօրւայ «թափանցիկ պետութեան» ողբերգութիւնն է, բայց սա փաստ է։ Սա հիմնական ուժերից պահանջելու է բարձր վերկուսակցական գիտակցում՝ համատեղ մեծ ջանքի գործադրմամբ հնարաւորինս մեղմել օտար ուժերի եւ պետութիւնների ազդեցութիւնը մեր ներքին գործերին։ Իսկ որ դա լինելու է, յատկապէս՝ ոչ բարեկամ պետութիւնների կողմից, ցաւօք, կասկած չի յարուցում։