Նարեկ Կարապետեան. ««Մեր ձեւով» շարժումն իրականացնելու է գործողութիւններ հինգ ուղղութիւններով, ստեղծւելու է հինգ աշխատանքային խումբ»
«ԱԼԻՔ» – Նախօրէին հայ ճանաչւած գործարար եւ բարերար, քաղբանտարկեալ Սամուէլ Կարապետեանի եղօր որդին յայտարարել է «Մեր ձեւով» կամաւորական շարժման մասին:
Կարապետեանը, որը նաեւ շարժման համակարգող ղեկավարն է նշել է, որ Շարժումն իրականացնելու է գործողութիւններ հինգ ուղղութիւններով, ստեղծւելու է հինգ աշխատանքային խումբ: Նա հերթով ներկայացրեց, թէ ինչ խնդիրներ պէտք է լուծեն այդ խմբերը:
«Առաջին խումբը մենք անւանել ենք նոր տնտեսութիւն՝ աշխատանք բոլորի համար, բարեկեցութիւն բոլորի համար: Հայաստանի տնտեսութիւնը, որը բաղկացած է երեք հիմնական ճիւղից՝ արդիւնաբերութիւն, ծառայութիւններ եւ գիւղատնտեսութիւն, հիմնականում հիմնւած է Սովետական Հայաստանի փլատականներից մնացած ընկերութիւնների վրայ: Հայաստանը 30 տարիների ընթացքում գրեթէ չի ստեղծել տնտեսական զարգացման նոր մոդել: Մենք հաւաքելու ենք համաշխարհային եւ Հայաստանի տնտեսագէտների թիմ, եւ նրանք մշակելու են Հայաստանի տնտեսական զարգացման նոր մոդելը»,- ասել է նա:
Երկրորդ խումբը Կարապետեանի ներկայացմամբ՝ զբաղւելու է երիտասարդ ընտանքիների խնդիրներով, դրանց լուծում տալու ուղղութեամբ:
«Երկրորդ խումբը մենք այն կոչում ենք մեծ հայկական ընտանիք: Մեծ ընտանիքին հասնելու համար երիտասարդ զոյգերը մեծ ճանապարհ պէտք է անցնեն եւ այդ ճանապարհին նրանք բախւում են բազմաթիւ խնդիրների՝ բնակարանային ֆոնդ, կայուն աշխատատեղեր, կրթական համակարգի հետ կապւած խնդիրներ:
Այս խումբը պէտք է մշակի եւ առաջարկի երիտասարդական քաղաքականութիւնը ու ժողովրդագրութեան քաղաքականութիւնը: Մեր երկրում ծնելիութեան պատկերը բաւական թոյլ է, անկում ունենք, եթէ այսպէս շարունակւի 2100 թւականին ըստ ՄԱԿ-ի տւեալների ՀՀ բնակչութիւնը լինելու է 1.7 մլն մարդ: Ժողովրդագրութեան եւ ծնելիութեան խնդրի հետ կապւած պէտք են յեղափոխական փոփոխութիւններ»,- ընդգծել է նա:
Երրորդ խումբը, Կարապետեանի ներկայացմամբ՝ արտաքին քաղաքական հայեցակարգ մշակող խումբն է:
«Սա շատ կարեւոր խումբ է եւ ունի մեծ աշխատանք մօտակայ ամիսների ընթացքում: Մեզ շատերն են հարցրել, թէ ինչու կարծիք չենք յայտնել խաղաղութեան պայմանագրի նախաստորագրման մասին: Կուզէի նշել, որ կան մի քանի մտավախութիւններ, որոնք պէտք է ուսումնասիրւեն մասնագէտների կողմից:
Ամենամեծ մտավախութիւնն այն է, որ ստորագրող երեք անձանցից միայն Ամերիկայի նախագահը չի խաբել հայ ժողովրդին: Պէտք է ուսումնասիրենք տեսնենք, եթէ իրական խաղաղութիւն լինելու է, եթէ այո՝ արտաքին քաղաքական մոդելը լինելու է մի ձեւ, իսկ եթէ՝ ոչ, այս ամէնը խօսում է, որ լինելու է ուրիշ ձեւ»,- ասել է Կարապետեանը:
Շարժման չորրորդ խումբը զբաղւելու է տաղանդաւոր երեխաների եւ երիտասարդների ուսման հետ կապւած խնդիրները լուծելու ծրագրերի մշակմամբ:
«Աշխարհի տարբեր ժողովուրդներին ճանաչում են յայտնի մարդկանցով, Հայ ժողովուրդը շատ տաղանդաւոր մարդիկ ունի, սակայն ծնողերը շատ դժւար ճանապարհով են կարողանում իրենց երեխային տան այն կրթութիւնը, որին նա արժանի է: Մենք առաջարկում ենք ստեղծել խումբ տաղանդաւոր երիտասարդների եւ երեխաների համար եւ հետագայում նաեւ պետական ծրագիր է լինելու, այդ խումբը զբաղւելու է ծրագրի մշակմամբ:
Ծրագիրը լինելու է այսպիսին՝ դպրոցից մինչեւ համալսարան մինչեւ աշխատանքի եւ ոլորտի մանսագիտական ուղղութիւն այդ երեխաները կը լինեն այդ խմբի հոգածութեան ներքոյ, որ յատուկ կրթութիւն ստանան»,- յայտարարել է Կարապետեանը:
Վերջին խումբը, նրա ներկայացմամբ՝ Հայ Առաքելական Սուրբ Եկեղեցու եւ ազգային արժէքնրի պահպանութեան խումբն է:
«Գիտէք, որ Սամուէլ Կարապետեանն իր համոզմունքներն արտայայտելու եւ նրանց հետեւելու համար այս պահին սահամանափակումների մէջ է: Դա մեզ համար հպարտութիւն է: Եկեղեցու համար սահամանափակումների մէջ լինելը մեծ պատիւ է բոլորիս համար: Մեր տեսակէտը մեր Եկեղեցու հանդէպ մի քիչ նաեւ ուրիշ է: Մենք տեսնում ենք, որ մեր եկեղեցին մեծ գործ ունի 21-րդ դարում: Եկեղեցին մեծ գործ ունի ապագայում, նա պէտք է փոխի մեզ, նա պէտք է փոխի մեր հասարակութիւնը: Մեր հասարակութիւնը քանդում է նաեւ մի ուրիշ բան՝ հպարտութիւնն ու գոռոզութիւնը, մեր եկեղեցին պէտք է սովորեցնի մեզ բոլորիս՝ ինչպէս լինել համեստ եւ աշխատասէր եւ ինչպէս չլինել հպարտ եւ դատարկ»,- շեշտել է նա:
