Հայ Առաքելական Եկեղեցու Երուսաղէմի պատրիարքարանը քննադատել է Վատիկանին

«ԱԼԻՔ» – Հայ Առաքելական Եկեղեցու Երուսաղեմի պատրիարքարանը խստօրէն դատապարտել է Վատիկանին վերջերս «Քրիստոնէութիւնն Ադրբեջանում. պատմութիւն եւ արդիականութիւն» միջազգային համաժողովի համար, որն անցկացւել է Հռոմում Ադրբեջանի կառավարութեան եւ վարչակարգի ակադեմիական քարոզչական ճակատի հովանու ներքոյ։

«Մենք պնդում ենք, որ Վատիկանը գործել է անպատասխանատու՝ թոյլ տալով, որ իր ակադեմիական հարթակը հմտօրէն օգտագործւի հանրայայտ եւ յօրինւած պատումի առաջմղման համար, որը ձգտում է ջնջել համաշխարհային ակադեմիական յիշողութիւնից Հայ Առաքելական Եկեղեցու պատմական ներկայութիւնը Հարաւային Կովկասում։ Առանց հայ գիտնականների մասնակցութեան նման միջոցառում կազմակերպելով՝ Վատիկանը իրեն թոյլ է տւել մեղսակից դառնալ բնիկ քրիստոնեաների պատմութեան խեղաթիւրմանը, որոնց ներդրումը համաշխարհային քրիստոնէութեան մէջ, իրենց իսկ գիտական խոստովանութեամբ, անհերքելի է։

Մենք պնդում ենք, որ Վատիկանը ականատես է եղել ռազմավարութեան, որը կոչւած է ոչ միայն օրինականացնելու ներկայիս տարածքային պահանջները Հայաստանի նկատմամբ, այլեւ վերաշարադրելու հին քաղաքակրթութիւնների առկայութիւնը, որոնց արմատները խորն են եւ որոնց պատմութիւնը հնարաւոր չէ ջնջել:

Ադրբեջանի այդ քարոզչական ճակատը ձգտում է կառուցել հետադիմական պատմութիւն, որն անարժան խորութիւն է հաղորդում իրենց երիտասարդ պետութեանը յանձին Ադրբեջանի:

Մենք հաստատում ենք, որ իսկական ժառանգութեան փոխարէն այդ վարչակարգի ակադեմիական ճակատը Վատիկանին առաջարկել է ներկայացում։

Նման կոնֆերանսներում արտայայտւած հիմնական թէզը, թէ Արցախի (Լեռնային Ղարաբաղի) հայկական քրիստոնէական յուշարձաններն այսպէս կոչւած «կովկասեան աղւանական» քաղաքակրթութեան ժառանգութիւնն են, պատմական ժխտման չարաբաստիկ գործողութիւն է։ Սա ուղղակի յարձակում է բնիկ ժողովուրդների ժառանգութեան վրայ, որոնց սուրբ աւանդոյթները պահպանւել են այս հողի վրայ հազարամեակներ:

Մենք կոչ ենք անում Վատիկանին պաշտպանել պատմական ճշմարտութիւնը եւ մերժել այն ամէնը, ինչը ձգտում է ջնջել բնիկ քրիստոնեայ համայնքների ժառանգութիւնը:

Կոչ ենք անում Վատիկանին հեռու մնալ դրանից եւ հաստատել իր յանձնառութիւնը Սուրբ եւ Առաքելական Հայ Ուղղափառ եկեղեցու քրիստոնէական աւանդոյթի իսկութիւնը պահպանելու հարցում։

Հայկական անցեալի ճշմարտութիւնը չի կարող թաղւել լաբբիստական եւ ֆինանսաւորւող ռեւիզիոնիստական ստի տակ: «Մեր եկեղեցիները, մեր վանքերը, մեր ճարտարապետութիւնը, մեր այբուբենը, մեր սրբերն ու նահատակները, մեր հին գերեզմանոցները, մեր սուրբ մասունքները, մեր աստւածաբանական դպրոցները եւ մեր ժողովուրդը հայ առաքելական աւանդութեան կենդանի վկայութիւնն են»,-նշել է Երուսաղէմի պատրիարքարանը։

News.am