Հայր Ասողիկ աբեղայ Կարապետեան. «Պէտք էր զարկ տալ ազգային-եկեղեցական միութեանը»

«ԱԼԻՔ» – «Վատիկանը միշտ էլ մնում է նոյնը. պարզապէս, պէտք է գիտնալ այդ «քաղաք-պետութեան» պատմութիւնը»,-արձագանգելով Սուրբ Աթոռի հայրապետական Գրիգորեան համալսարանում Ադրբեջանի ու Վատիկանի կազմակերպած «Քրիստոնէութիւնը Ադրբեջանում. պատմութիւն եւ արդիականութիւն» խորագրով միջազգային գիտաժողովին, գրում է Մայր աթոռ Սուրբ Էջմիածնի Թանգարանների եւ արխիւի տնօրէն Հայր Ասողիկ աբեղայ Կարապետեանը։

Նա շարունակում է.

«Պարզապէս, պէտք չէր երբեւէ լինել տիրադրուժ եւ «սուր ճոճել» հարազատ Հոգեւոր Կենտրոնի դէմ՝ օտար կրօնական կենտրոնին բարեբանելով…

Մինչդեռ, պէտք էր զարկ տալ ազգային-եկեղեցական միութեանը՝ աշխարհսփիւռ հայութեանը խարսխելով ազգապահ ու հայրենաշէն Մայր Աթոռ Սուրբ Էջմիածնին:

Հայոց երկրի եւ ազգային ինքնագիտակցութեան ու հոգեւոր անկախութեան վեմը Մայր Աթոռ Սուրբ Էջմիածինն է:

Համազգային հոգեւոր, մշակութային, քաղաքական միասնութեան առկայութեամբ միայն վատիկանները կը սաստւեն՝ զերծ մնալով ամէն տեսակ ոտնձգութիւններից:

Իսկ Հայոց Եկեղեցին՝ ի գլուխ Մայր Աթոռ Սուրբ Էջմիածնի, դարերի հոլովոյթում որքա՜ն բիւզանդիոններ ու վատիկաններ է յաղթահարել. այս եւ գալիք բոլորին էլ կը յաղթահարենք»։