«ԱԼԻՔ» – Իրանն ուշադիր հետեւում է իր հիւսիս-արեւմտեան սահմանի երկայնքով տեղի ունեցող իրադարձութիւններին: Այս մասին երէկ՝ օգոստոսի 17-ին, յայտարարել է ԱԳ նախարարութեան պաշտօնական ներկայացուցիչ Էսմայիլ Բաղային՝ զգուշացնելով, որ Հարաւային Կովկասում արտատարածաշրջանային ուժերի ներկայութիւնը վնասակար կը լինի եւ կաւելացնի աշխարհաքաղաքական բարդութիւնները։
Բաղային ընդգծել է Հարաւային Կովկասի ռազմավարական կարեւորութիւնն Իրանի եւ տարածաշրջանային այլ պետութիւնների, մասնաւորապէս՝ Ռուսաստանի համար՝ մէջբերելով քաղաքական, տնտեսական եւ աշխարհաքաղաքական նկատառումներ։
Նա նշել է, որ Իրանը բաց աչքերով հետեւում է Հարաւային Կովկասում տեղի ունեցող զարգացումներին եւ չի թերագնահատի որեւէ զարգացում։
«Արտաքին միջամտութիւնը եւ արտատարածաշրջանային ուժերի ներկայութիւնը միայն կը խորացնեն աշխարհաքաղաքական բարդութիւնները եւ որեւէ կառուցողական նպատակի չեն ծառայի»,- ընդգծել է ԱԳՆ պաշտօնական ներկայացուցիչը:
Անդրադառնալով Հայաստանի եւ Ադրբեջանի միջեւ վերջերս կնքւած համաձայնագրին՝ նա նշել է, որ 12-րդ յօդւածը սահմանում է, որ նրանց ընդհանուր սահմանների երկայնքով օտարերկրեայ ռազմական ուժեր չեն տեղակայւի։
«Մենք շատ զգայուն ենք այդ հարցի նկատմամբ, քանի որ Հայաստանն ինքը գիտակցում է օտարերկրեայ ուժերի ներկայութեան հետեւանքները»,- ասել է Բաղային։
ԱԳՆ մամլոյ խօսնակը նաեւ յայտնել է Իրանի պատրաստակամութիւնը՝ ամրապնդելու յարաբերութիւնները տարածաշրջանի երկրների հետ եւ աջակցելու Հարաւային Կովկասում կայունութիւնն ու անվտանգութիւնն ամրապնդող ցանկացած նախաձեռնութեան։
