Թեւան Պօղոսեան. «Ազգային իշխանութիւնը գերիներ, պատանդներ ունենալու պարագայում առնւազն կասեր՝ որեւէ փաստաթուղթ չի նախաստորագրւելու, պարոն Թրամփ, եթէ չապահովես Բաքւից ռազմագերիների տեղափոխումը»

«ԱԼԻՔ» – Օրեր անց Բաքւում կը փակւի Կարմի խաչի միջազգային կոմիտէի գրասենեակը, որի ներկայացուցիչներն ըստ էութեան միակն էին, որ կարող էին այցելել Բաքւի բանտերում պահւող հայ գերիներին ու պատանդներին, ապահովել նրանց եւ Հայաստանում գտնւող հարազատների միջեւ կապը։

Չնայած Բաքւի բանտերում հայ պատանդների ու գերիների առկայութեանը, օգոստոսի 8-ին Վաշինգոտում Նիկոլ Փաշինեանն ԱՄՆ նախագահ Դոլանդ Թրամփի միջնորդութեամբ Ալիեւի հետ նախաստորագրեցին  «Խաղաղութեան պայմանագիրը»։ Այս փաստաթղթում եղած 17 կէտերից որեւէ կէտում պատանդներին ու գերիներին վերադարձնելու վերաբերեալ որեւէ յիշատակում չկայ, կէտերից մէկը վերաբերում է միայն անհետ կորածներին։

Մարդկային զարգացման միջազգային կենտրոնի ղեկավար, քաղաքագէտ Թեւան Պօղոսեանի խօսքով՝ Ալիեւի համար Բաքւում պահւող գերիներն ու պատանդները վաճառքի օբիեկտներ են, նա վաճառելու է Թրամփին, կամ ռուսական կողմին, կամ աշխարհում որեւէ այլ երկրի, ում հետ ունի շահեր։

«Վստահ եմ, որ Ալիեւն անձնական դաշտում այնպէս է անելու, որ գերիներն ու պատանդները երկար կեանք չունենան, ջրի հետ կարող է ինչ-որ բան տալ այդ մարդկանց։

Տեսէք, հիմա հայկական կողմն ի՞նչ է անում, նստած ասում է՝ այս մարդն ո՞վ էր, ինչո՞ւ եկաւ, ինչո՞ւ գնաց։ Ազգային իշխանութիւնը գերիներ, պատանդներ ունենալու պարագայում առնւազն կասէր՝ որեւէ հանդիպում Վաշինգտոնում չի կարող լինել, որեւէ փաստաթուղթ չի նախաստորագրւելու, պարոն Թրամփ, եթէ այդ հանդիպման ժամանակ չապահովես Բաքւից հայ ռազմագերիների տեղափոխումը Վաշինգտոն, իսկ այնտեղից էլ ինձ փոխանցես։ Սա ես միայն մէկ օրինակ ասացի»,- 168.am-ի հետ զրոյցում նշել է քաղաքագէտ Թեւան Պօղոսեանը։

Թէ ինչ պէտք է անի հայ ազգը, Թեւան Պօղոսեանը նշում է՝ որպէս հասարակութիւն՝ ամէն կերպ պէտք է Ալիեւին բացատրենք, որ իր նպատակին չի կարող հասնել։

«Այսօրւանից պէտք է խօսենք մեր ռազմագերիների մասին, Արցախի ռազմաքաղաքական ղեկավարութեան մասին, նրանց ներկայացնենք՝ որպէս ազգային հերոսներ, փողոց անւանենք, դպրոցում նրանց մասին խօսենք, որպէսզի Ալիեւը հասկանայ՝ ինչով որ ցանկանում է հայ ազգի աչքը վախեցնի, իր մօտ չի ստացւելու, որովհետեւ այդ մարդիկ իրենց կեանքի օրօք դարձել են ազգային հերոս։

Երբ այդպէս անենք, այդ ժամանակ Ալիեւը կը մտածի, թէ ինչ անի այդ մարդկանց հետ։ Ես շատ ուրախ կը լինէի, եթէ ազգային իշխանութիւն ունենայինք, ու այս ամենն աներ ազգային իշխանութիւնը։ Դուք էլ ձեր հարցերում պէտք է ասէք՝ ոչ թէ ռազմագերիներ, այլ ազգային հերոսներ»,- յաւելել է նա։

Շարունակելով միտքը, Թեւան Պօղոսեանն ասել է, քանի որ Հայաստանում այսօր չկայ ազգային իշխանութիւն, որը կը զբաղւի հայ ռազմագերիների, պատանդների խնդրով, այդ խնդրով պէտք է բոլորը զբաղւեն անհատապէս։

«Թեման կարող են բարձրաձայնել, այդ թւում՝ իրաւապաշտպան կազմակերպութիւնները, բայց նրանք այլ բան չեն կարող անել։ Այսօր նոյնիսկ Հայաստանում իրաւապաշտպանները չեն կարողանում որեւէ բան անել։ Այսօր իրական իրաւապաշտպանները բարձրաձայնում են խնդրի մասին, տարբեր կառոյցների նամակներ գրում, բայց երբ երկրում չկայ ազգային իշխանութիւն ու հասարակական մեծ պահանջ՝ ուղղւած այդ իշխանութիւններին, վիճակն այսպէս պէտք է լինի։

Այս «գործողը»՝ Նիկոլ Փաշինեանը, մի բան ճիշտ է ասում՝ եթէ ժողովուրդը չցանկանայ, օրւայ իշխանութիւնը մի օր էլ չի մնայ։ Դրա համար այսօր գերիների հարցը բարդել միայն ընդդիմութեան կամ իրաւապաշտպան կազմակերպութիւնների վրայ՝ սխալ է, բոլորն անհատապէս պէտք է իրենց վերաբերմունքը ցոյց տան։

ԵՄ-ն ցոյց տւեց, չէ՞, որ քաղաքական ինստիտուտ է, ոչ թէ արժէքների, ամբողջ Արցախը ցեղասպանւեց, մարդիկ հայրենազրկւեցին՝ ձայն լսեցի՞ք։ Հիմա պարզ չէ՞, որ «պուպուշ» երեւալու համար արժէքներից են խօսում, բայց երբ միջազգային յարաբերութիւններում իրական շահերի պահը գալիս է, բոլորը մոռանում են արժէքների մասին ու մնում են միայն շահերը»,- շեշտել է քաղաքագէտը։

Նա նաեւ ընդգծել է՝ ՀՀ-ում օրւայ իշխանութիւնները չունեն որեւէ ազգային արժէք։

Յիշեցնենք՝ 2023 թւականի սեպտեմբերի 19-ին Ադրբեջանն Արցախի դէմ սկսած պատերազմից յետոյ խաղաղ բնակիչներին սպանելու սպառնալիքի տակ սեպտեմբերի 27-ից սկսած գերեվարեց Արցախի նախկին բարձրաստիճան ռազմաքաղաքական ղեկավարութեանը։ Սեպտեմբերի 27-ին Հակարիի կամրջից Ադրբեջանը գերեվարեց Արցախի նախկին պետնախարար Ռուբէն Վարդանեանին եւ ՊԲ նախկին հրամանատարի տեղակալ Դաւիթ Մանուկեանին։ Իսկ սեպտեմբերի 28-ին Արցախի նախկին արտգործնախարար Դաւիթ Բաբայեանը յայտարարութիւն էր տարածել՝ նշելով, որ ադրբեջանական կողմը պահանջել է իր ժամանումը Բաքու՝ համապատասխան հետաքննութեան համար։

Այս պահին Բաքւում գերութեան մէջ են նաեւ Արցախի Հանրապետութեան նախկին երեք նախագահները՝ Արկադի Ղուկասեանը, Բակօ Սահակեանը, Արայիկ Յարութիւնեանը,  ՊԲ նախկին հրամանատար Լեւոն Մնացականեանը, ԱԺ նախագահ Դաւիթ Իշխանեանը։ Նրանց բոլորին տարբեր ծանր յօդւածներով մեղադրանքներ են առաջադրւել, կալանքի ժամկէտները մի քանի անգամ արդէն երկարաձգւել են։ Այս պահին ընթանում է շինծու դատական գործընթացը։

Զրոյցը՝ ԶՒԱՐԹ ԽԱՉԱՏՐԵԱՆԻ