Հայկ Նահապետեան. «Դրսից է որոշւում. Փաշինեանն ո՞վ է, որ որոշի՝ պաշտպանական ծախսերն աւելացնի՞, թէ՞ ոչ»

«ԱԼԻՔ» – Նախորդ շաբաթ Նիկոլ Փաշինեանը յայտարարել է, որ Հայաստանը մտադիր չէ յաջորդ՝ 2026 թւականին աւելացնել պաշտպանական ծախսերը։

«Հնարաւոր է, որ 2026 թւականի բիւջէում ծախսերի էական աճ կամ պաշտպանական ծախսերի աճ ընդհանրապէս չլինի։ Կարծում եմ՝ տրամաբանական է, մեր գնահատականն այս պահին սա է»,- ՀՀ կառավարութեան նիստից յետոյ լրագրողների հետ ճեպազրոյցում ասել է Նիկոլ Փաշինեանը։

Նիկոլ Փաշինեանի այս յայտարարութիւնից առաջ Հանրային հեռուստաընկերութեանը տւած հարցազրոյցում Ֆինանսների նախարար Վահէ Յովհաննիսեանը եւս խօսել էր այս մասին՝ նշելով, որ պաշտպանական ծախսերը չեն պատրաստւում յաջորդ տարի աւելացնել։

Անվտանգային եւ ռազմական հարցերով փորձագէտ Հայկ Նահապետեանի բնորոշմամբ՝ սա Նիկոլ Փաշինեանի յստակ քաղաքականութիւնն է, որը թելադրւած է Ալիեւի կողմից։

«Մեծ հաշւով՝ դրսից է որոշւում մեր բանակի անձնակազմի քանակը, սպառնազինութիւնը, զինատեսակները։ Եթէ Ալիեւն է որոշում, որ, այսպէս կոչւած, «Զանգեզուրի միջանցք»-ում, որն իրականում «Թուրանի միջանցք» է, հայ մաքսաւոր, սահմանապահ լինի՞, թէ՞ ոչ, հետեւաբար՝ Փաշինեանն այստեղ ո՞վ է, որ որոշի՝ պաշտպանական ծախսերն աւելացնի՞, թէ՞ ոչ։ Նիկոլ Փաշինեանն անում է այն, ինչն իրեն թելադրում են»,- 168.am-ի հետ զրոյցում նշել է Հայկ Նահապետեանը։

Նա յիշեցրել է՝ երբ Նիկոլ Փաշինեանին 2018 թւականին բերեցին իշխանութեան, նա չէր ասում, որ ՀՀ անկախութեան հռչակագիրը գլխացաւանք է, չէր ասում, որ բանակի ծախսերը պէտք է կրճատւեն։ Եկաւ, պարտւեց ու այսօր էլ անում է այն, ինչ թելադրում են։

«Մեր պաշտպանական ծախսերի կրճատումը ձեռնտո՞ւ է Հայաստանին, իհարկէ, ձեռնտու չէ, իսկ այն, ինչը ձեռնտու չէ Հայաստանին, օգուտ է Ադրբեջանին։ Այսօր Ադրբեջանին ու Թուրքիային ձեռնտու է Փաշինեանի իշխանութիւնը, որովհետեւ նրանից բացի, դժւար թէ գտնւի մէկը, որ նրանց համար կանի այն ամէնը, ինչ այսօր անում է Նիկոլ Փաշինեանը։

Թուրքիայի ու Ադրբեջանի համար Հայաստանը՝ որպէս դիմադրողականութեան օջախ, «Թուրանի» ճանապարհի խոչընդոտ, պէտք է դուրս մղւի։ Այսօր մեծ Բրիտանիայի ներկայացուցիչները մեր տարածաշրջանում Ադրբեջանն ու Թուրքիան  են։ Արցախն այս երկրների համար խոչընդո՞տ էր, այո՛, ամբողջութեամբ հայաթափւեց, «միջանցքը» խոչընդո՞տ էր, այո՛, բացեցին, Ռուսաստանի տնտեսական ներկայացւածութիւնը Հայաստանում խոչընդո՞տ է, այո՛։ Հիմա սրա դէմ են աշխատում, որից յետոյ Հայաստանը լաւագոյն դէպքում կարող է դառնալ թուրք-ադրբեջանական վիլայեթ, վատագոյն դէպքում՝ առհասարակ չլինի»,- յաւելել է Հայկ Նահապետեանը։

Նրա բնորոշմամբ՝ միայն տգէտը կարող է ասել, որ ստեղծում է պրոֆեսիոնալ բանակ, ու կրճատի ռազմական ծախսերը։

«Աւելին՝ «պրոֆեսիոնալ բանակ» հասկացութիւն գոյութիւն չունի, ի՞նչ է, երբ 90-ականներին Արցախեան ազատամարտում հայերը յաղթեցին, պրոֆեսիոնալ բանակ ունէի՞ն։ Առաջին պատերազմում սիրողական բանա՞կ էինք ստեղծել, մինչեւ հիմա սիրողական բանա՞կ է, յիմարութիւն է։ Անյիշելի ժամանակներից բանակի կազմաւորման 3 սկզբունք կայ՝ զօրակոչային, պայմանագրային եւ վարձկան։ Մեր բանակը զօրակոչային ու պայմանագրային է, օրինակ, ԱՄՆ-ում զօրակոչային բանակ չկայ, կայ միայն պայմանագրային եւ մասնաւոր»,- ընդգծել է Հայկ Նահապետեանը։

Զրոյցը ԶՒԱՐԹ ԽԱՉԱՏՐԵԱՆԻ