Արաղչի. «ՇՀԿ-ին Իրանի անդամակցութիւնը չեղարկելու մասին լուրերը անհիմն են»

«ԱԼԻՔ» – ԱԳ նախարարը նախագահ Փեզեշքիանի այցը Չինաստան համարել է երկու երկրների յարաբերութիւնների պատմութեան կարեւոր իրադարձութիւններից մէկը եւ Շանհայի կազմակերպութեանն Իրանի անդամակցութիւնը չեղարկելու մասին որոշ լուրերի վերաբերեալ ընդգծել է. «Նման լուրերը անհիմն են, եւ այս կազմակերպութեան անդամ պետութիւններն շարունակում են աջակցել Իրանին»։

ԻՌՆԱ-ի փոխանցմամբ՝ Սէյէդ Աբբաս Արաղչին չորեքշաբթի, սեպտեմբերի 3-ին Չինաստան կատարած այցից վերադառնալուց յետոյ նշել է. «Թեհրանը վախենալու բան չունի՝ ո՛չ բանակցութիւններից, ո՛չ էլ պատերազմից»:

ՌԴ նախագահի հետ նախագահ Փեզեշքիանի հանդիպման տեւողութեան պատճառի վերաբերեալ արտգործնախարարը նշել է. «Իրանի եւ Ռուսաստանի միջեւ կան քննարկամանը կարօտ բազմաթիւ հարցեր: Քննարկւել են քաղաքական եւ տնտեսական բազում հարցեր»։

Ի պատասխան Մասուդ Փեզեշքիանի հետ Չինաստանի նախագահի հանդիպման կարճ տեւողութեան մասին որոշ պնդումների՝ Արաղչին պարզաբանել է, որ այցը երկկողմանի այց չէր, եւ հաշւի առնելով բազմաթիւ երկրների ղեկավարների ներկայութիւնը, սովորական է, եթէ նման հանդիպումները միջազգային գագաթնաժողովը հիւրընկալող կողմի հետ տեւեն կարճ»։

Եւրոպական եռեակի (E3) կողմից «Snapback»-ի ակտիւացմանը հակազդելու վերաբերեալ արտգործնախարարը նշել է. «Իրանի, Չինաստանի եւ Ռուսաստանի համատեղ նամակից բացի, Նիւ Եօրքում Իրանի ներկայացուցիչները շարունակում են կապ պահել իրենց ռուս եւ չինացի գործընկերների հետ: Ընթացքի մէջ են նաեւ այլ նախաձեռնութիւններ կառավարութեան միջոցներով»։

Նրա խօսքով՝ Ռուսաստանը եւ Չինաստանը Անվտանգութեան խորհրդին են ներկայացրել բանաձեւի նախագիծ, որի շուրջ Իրանը եւս շարունակում է ակտիւօրէն խորհրդակցութիւններ անցկացնել բոլոր կողմերի հետ: Մենք ամէն ինչ կանենք այս գործողութիւնը կանխելու համար, որպէսզի աշխարհը հասկանայ, որ այս գործողութիւնն օրինական հիմք չունի»:

Յետադարձ մեխանիզմի ակտիւացման հետ միաժամանակ Շանհայի համագործակցութեան կազմակերպութեանը Իրանի անդամակցութեան չեղարկման հնարաւորութեան մասին որոշ լուրերի վերաբերեալ Արաղչին ընդգծել է. «Նման կէտ չկայ, եւ այս հարցի մասին վերջին հանդիպման ժամանակ որեւէ յիշատակում չի եղել։ Ընդհակառակը, այս հարցում Շանհայի անդամ պետութիւնները տարբեր առիթներով իրենց աջակցութեան մասին են յայտնել Իրանի Իսլամական Հանրապետութեանը»։

Շանհայի առաջնորդների ոչ պաշտօնական երեկոյթի յիշատակի լուսանկարում նախագահի բացակայութեան վերաբերեալ հարցին Արաղչին պատասխանել է. «Իրանն ունի երեկոյթներին մասնակցելու սեփական էտիկա՝ հիմնւած իսլամական օրէնքների, մշակոյթի եւ արժէքների վրայ: Բացի այդ, խնջոյքի հրապարակւած լուսանկարը գագաթնաժողովի պաշտօնական լուսանկարը չէ, եւ գագաթնաժողովի գլխաւոր լուսանկարը արւել է յաջորդ օրը՝ պաշտօնական նիստի մեկնարկից առաջ»:

Արտաքին գործերի նախարարը նաեւ ակնարկել է Իրանի եւ Միջազգային ատոմային էներգիայի գործակալութեան միջեւ յարաբերութիւնների զարգացումների մասին. «Հաշւի առնելով այս զարգացումները, թէ ինչպէս, ինչ ձեւաչափով ու շրջանակում պէտք է տեղի ունենայ Իրանի եւ գործակալութեան միջեւ համագործակցութիւնը, մենք շարունակում ենք բանակցել, եւ, ի դէպ, գործակալութիւնն էլ ընդունել է, որ անհրաժեշտ է մշակել համագործակցութեան նոր շրջանակ»:

Արաղչին յաւելել է. «Համապատասխանաբար, բանակցութիւններն ընթացքի մէջ են, եւ նոր համագործակցութիւն ձեւաւորելու համար նախ պէտք է աւարտին հասնի բանակցութիւննրի այս փուլը»: