Իրանի, Հնդկաստանի եւ Ուզբեկստանի միջեւ եռակողմ քաղաքական խորհրդակցութիւններ են տեղի ունեցել
«ԱԼԻՔ» – Իրանի, Հնդկաստանի եւ Ուզբեկստանի միջեւ եռակողմ քաղաքական խորհրդակցութիւններ են տեղի ունեցել: Հաղորդում է «Մեհր»-ը:
Քաղաքական խորհրդակցութիւնների շրջանակներում առաջին եռակողմ հանդիպումը տեղի է ունեցել երեք երկրների ԱԳ նախարարութիւնների տարածաշրջանային գլխաւոր տնօրէնների մակարդակով երէկ՝ սեպտեմբերի 13-ին, Թեհրանում։
Գոհունակութիւն յայտնելով այս եռակողմ հանդիպման անցկացման կապակցութեամբ՝ երեք կողմերն ընդգծել են դրա կանոնաւոր եւ տարեկան կազմակերպման կարեւորութիւնը՝ համաձայն փոխադարձ շահերի ապահովման եւ տարածաշրջանում բարեկեցութեան ու բարգավաճման խթանման։
Կողմերը շեշտել են համագործակցութեան ընդլայնման եւ խորացման կարեւորութիւնը, մասնաւորապէս՝ կապի, որոշակիօրէն նաւահանգիստների ռազմավարական դիրքի եւ Հիւսիս-Հարաւ միջազգային տարանցիկ միջանցքի հետ կապւած ոլորտներում: Նրանք վերանայել են Չաբահարի աշխատանքային խմբի 2024 թւականի նոյեմբերին Հնդկաստանի Մումբայ քաղաքում կայացած երրորդ հանդիպման ժամանակ կայացւած որոշումների իրականացման գործում գրանցւած առաջընթացը։
Երեք կողմերը նաեւ վերանայել եւ ընդգծել են առեւտրային յարաբերութիւնների խթանման միջոցառումները եւ փոխադարձ հետաքրքրութիւն ներկայացնող այլ հարցեր։
