Պուտինը Մոսկւայում Ազգային նոր տիեզերական կենտրոն է բացել
«ԱԼԻՔ» – Ռուսաստանի նախագահ Վլադիմիր Պուտինը Մոսկւայում Ազգային նոր տիեզերական կենտրոն (ԱՏԿ) է բացել: Հաղորդում է ՏԱՍՍ-ը։
ՌԴ նախագահը Քաղաքի օրը այցելել է Մոսկւայի արեւմուտքում գտնւող շինարարական համալիր։
Բացման արարողութիւնը տեղի է ունեցել Ազգային տիեզերական կենտրոնի իրավիճակային կենտրոնում։ Դրան մասնակցել են Մոսկւայի քաղաքապետ Սերգէյ Սոբեանինը, փոխվարչապետ Դենիս Մանտուրովը եւ «Ռոսկոսմոս»-ի գլխաւոր տնօրէն Դմիտրի Բականովը, ինչպէս նաեւ հրթիռատիեզերական ճիւղի ձեռնարկութիւնների ղեկավարներն ու տիեզերագնացներ Սերգէյ Կրիկալիովը եւ Օլեգ Կոնոնենկօն։
Ազգային տիեզերական կենտրոնի շէնքերի համալիրը Ֆիլիովսկի Պարկ թաղամասում գտնւող Խրունիչեւի անւան պետական գիտաարտադրական տիեզերական կենտրոնի տարածքի վերակազմաւորման հիմնական մասն է։ Սա Մոսկւայի կառավարութեան եւ «Ռոսկոսմոս» պետական կորպորացիայի համատեղ նախագիծ է։ Շինարարական աշխատանքները սկսւել են 2019 թւականից։
Ազգային տիեզերական կենտրոնի կենտրոնական տարրը դարձել է 288 մետր բարձրութեամբ եռակողմ, 47-յարկանի աշտարակը, որը նման է մեկնարկային հարթակի վրայ տեղադրւած հրթիռի։ Ազգային տիեզերական կենտրոնը Մոսկւայի ամենաբարձր շէնքերի շարքում զբաղեցրել է 10-րդ տեղը։ ԱՏԿ-ի ստեղծումը թոյլ կը տայ մէկ հարթակում կենտրոնացնել հրթիռատիեզերական արդիւնաբերութեան մի շարք հիմնական կազմակերպութիւններ՝ «Ռոսկոսմոս» պետական կորպորացիայի կենտրոնական գրասենեակը եւ իրավիճակային կենտրոնը, ճիւղային ինստիտուտներն ու ձեռնարկութիւնները, որոնք ներկայումս ցրւած են ամբողջ Մոսկւայում։ Նախնական գնահատականներով՝ Ազգային տիեզերական կենտրոնում կը ստեղծւի մինչեւ 12 հազար աշխատատեղ։
ԱՏԿ-ի կառուցումը դարձել է վերջին տարիներին Մոսկւայում իրականացւած ամենաբարդ ինժեներական եւ շինարարական նախագծերից մէկը։
ԱՏԿ-ի կառուցմանը զուգահեռ, Մոսկւայի կառավարութիւնը մի շարք միջոցառումներ է ձեռնարկել՝ ապագայ կենտրոնի եւ ընդհանուր առմամբ Ֆիլեւսկիի այգու տարածքի տրանսպորտային հասանելիութիւնը բարելաւելու համար։
