Արաբական եւ իսլամական երկրները անվերապահ աջակցութիւն են յայտնել Կատարին
«ԱԼԻՔ» – Արաբական եւ իսլամական երկրներն իրենց անվերապահ աջակցութիւնն ու զօրակցութիւնն են յայտնել Կատարին: Ինչպէս հաղորդում է «Թասնիմ»-ը՝ այս մասին ասւած է Դոհայում կայացած արտակարգ գագաթնաժողովի ամփոփիչ յայտարարութիւնում:
«Մենք ամենախիստ կերպով դատապարտում ենք Դոհայի դէմ Իսրայէլի վախկոտ եւ անօրինական ագրեսիան, համերաշխութիւն ենք յայտնում Կատարին եւ համաձայն ենք երկրի կողմից ձեռնարկւող որեւէ գործողութեան հետ՝ ի պատասխան։
Մենք դատապարտում ենք Իսրայէլի կողմից Կատարի վրայ հնարաւոր յարձակման կրկնութեան սպառնալիքը եւ վճռականօրէն մերժում ենք Իսրայէլի ագրեսիան արդարացնող որեւէ պատրւակ։ Անհրաժեշտ է հակազդել տարածաշրջանում նոր իրականութիւն պարտադրելու Իսրայէլի ծրագրերին»,-ասւած է ամփոփիչ փաստաթղթում:
Գագաթնաժողովի մասնակիցները խստօրէն դատապարտել են նաեւ որեւէ պատրւակով պաղեստինցի ժողովրդին տեղահանելու Իսրայէլի փորձերը՝ մերժելով բռնազաւթւած տարածքների վերջնական բռնակցման Իսրայէլի ծրագրները:
Գագաթնաժողովի ընթացքում որոշում է կայացւել համակարգել ՄԱԿ-ին Իսրայէլի անդամակցութեան սառեցմանն ուղղւած ջանքերը:
