Իրանը ներկայացրել է իր դիտարկումները Դոհայի արտակարգ հանդիպման եզրափակիչ յայտարարութեան վերաբերեալ

«ԱԼԻՔ» – ԱԳ նախարարութիւնը ներկայացրել է Դոհայի հանդիպման եզրափակիչ յայտարարութեան վերաբերեալ Իրանի դիտարկումներն ու տեսակէտները: Տեղեկացրել է «Թասնիմ»-ը:

Յայտարարութեան մէջ ասւած է. «Կատարի դէմ Իսրայելի ագրեսիայի վերաբերեալ Արաբա-իսլամական արտակարգ գագաթնաժողովի եզրափակիչ յայտարարութեան վերաբերեալ Իրանի Իսլամական Հանրապետութեան պատւիրակութիւնը ցանկանում է պարզաբանել իր դիրքորոշումը՝ դրանում ներառւած մի շարք հարցերի վերաբերեալ։

ԻԻՀ-ը կրկին իր աջակցութիւնն է յայտնում Պաղեստինի ժողովրդի ինքնորոշման անքակտելի իրաւունքի իրականացման վերաբերեալ եւ խստօրէն դատապարտում է Իսրայէլի բռնազաւթող ռեժիմի կողմից Պաղեստինի ժողովրդի դէմ կատարւած բարբարոսական յանցագործութիւնները։ Իրանի պետութեան եւ ժողովրդի աջակցութիւնը Պաղեստինի գործին անհերքելի է:

Պաղեստինեան հարցի վերջնական լուծման եւ տարբեր պետութիւնների ու կազմակերպութիւնների կողմից ներկայացւած նախաձեռնութիւնների, այդ թւում՝ Նիւ Եօրքի հռչակագրով «երկու պետութիւն» ձեւաչափով լուծումն՝ անկախ Պաղեստինի ստեղծման վերաբերեալ, ինչպէս նաեւ «արաբական խաղաղութիւն» նախաձեռնութեան վերաբերեալ, որն արտացոլւած է յայտարարութեան մի քանի պարբերութիւններում, Իրանի Իսլամական Հանրապետութիւնը յայտարարում է, որ այսպէս կոչւած «երկու պետութիւն» ձեւաչափը ի զօրու չէ լուծելու Պաղեստինեան հարցը: Մեր կարծիքով՝ միակ իրական եւ կայուն լուծումը միասնական ժողովրդավարական պետութեան ստեղծումն է, ներկայացնելով ամբողջ Պաղեստինի ժողովուրդը, որը իրականացւելու է հանրաքւէի միջոցով եւ բոլոր պաղեստինցիների՝ ինչպէս բռնազաւթւած տարածքների ներսում, այնպէս էլ դրանից դուրս մասնակցութեամբ:

Հետեւաբար, անընդունելի համարելով բացառում ենք յայտարարութեան մէջ նշւած նմանատիպ հասկացութիւնները, ներառեալ Արեւելեան Երուսաղէմը, 1967 թւականի սահմաններ, եւ այլնին վերաբերող որեւէ յղումները:

Ընդգծում ենք նաեւ, որ իսրայէլական ռեժիմի ճանաչման վերաբերեալ Իրանը վերահաստատում է, որ այս յայտարարութեան վերաբերեալ ձայնակցմանը միանալը չպէտք է բացայայտ կամ անուղղակիօրէն մեկնաբանւի որպէս իսրայէլական ռեժիմի ճանաչում։

Պաղեստինի ժողովրդի ինքնորոշման իրաւունքի վերաբերեալ Իրանն ընդգծում է, որ միւս խաղաղասէր ժողովուրդների օրինակով, պաղեստինեան ժողովուրդն իրաւունք ունի անհրաժեշտ միջոցներ կիրառելու իր ինքնորոշման, եւ գաղութացնող բռնազաւթումից ազատւելու անօտարելի իրաւունքն իրականացնելու համար։

Հաշւի առնելով իսրայէլական բռնազաւթիչ ուժերի յանցագործութիւնները, ոչինչ չի կարող սահմանափակել այս իրաւունքը։ Միջազգային իրաւունքի համաձայն՝ մեր ընդհանուր պարտականութիւնն է նաեւ աջակցել այս գործին։ Հետեւաբար, մենք ընդգծում ենք համապարփակ մօտեցման անհրաժեշտութիւնը, որում հաշւի են առնւած բոլոր պաղեստինցիների շահերն ու մտահոգութիւնները, եւ, հետեւաբար, աջակցում ենք պաղեստինեան ժողովրդի կողմից ձեռք բերւած եւ նրա կողմից ընդունւած ցանկացած պաղեստինեան ազգային միասնութեան համաձայնագրի։

Միջնորդական ջանքերի եւ Միացեալ Նահանգների դերակատարութեան վերաբերեալ, չնայած Իրանի Իսլամական Հանրապետութիւնը գնահատում է Կատարի եւ Եգիպտոսի անխոնջ ջանքերը՝ անյապաղ եւ համապարփակ հրադադարի հասնելու եւ պաղեստինցի ժողովրդի անսահման տառապանքները մեղմելու համար, Իրանն ընդգծում է, որ Ամերիկայի Միացեալ Նահանգների քաղաքականութիւնն ու գործողութիւններն են, որ գործնականում հանգեցրել են Իսրայէլի ռեժիմի կողմից պաղեստինցի ժողովրդի դէմ ագրեսիայի շարունակմանը: Նման իրականութեան լոյսի ներքոյ, Իրանի Իսլ. Հանրապետութիւնը կարծում է, որ ԱՄՆ-ը չի կարող ճանաչւել կամ համարւել որպէս անաչառ միջնորդ այս հակամարտութիւնում արդար ու կայուն խաղաղութեան հասնելու գործում։

Մենք կոչ ենք անում գագաթնաժողովի դիւանին ժողովի վերջնական զեկոյցում ներառել Իրանի Իսլամական Հանրապետութեան պատւիրակութեան վերապահումները»։