«ԱԼԻՔ» – «Դոհայի վրայ յարձակումը ուժի ցուցադրութիւն չէր, այլ՝ յուսահտութեան եւ անճարակութեան նշան: Իր դիրքորոշմանը վստահ ռեժիմը բանակցողներին ռմբակոծելու կարիք չունի»: Այս մասին, երէկ՝ սեպտեմբերի 15-ին, Դոհայում կայացած արաբական եւ իսլամական երկրների արտակարգ գագթնաժողովի ժամանակ յայտարարել է Հանրապետութեան նախագահ Մասուդ Փեզեշքիանը:
Իր ելոյթում, նախագահ Փեզեշքիանն անդրադառնալով սեպտեմբերի 9-ին Դոհայի վրայ սիոնիստական ռեժիմի յարձակմանը՝ նշել է, որ այն ծրագրաւորւած յարձակում էր, որը նպատակ ունէր վիժեցնել Գազայում ցեղասպանութեանը վերջ տալու նպատակով գործադրւող դիւանագիտական ջանքերը:
«Դիւանագիտութեան վրայ այս յարձակումն աւելին է, քան պարզապէս յանցագործութիւն. դա հրապարակային եւ անամօթ յայտարարութիւն է այն մասին, որ այժմ որոշիչ է ոչ թէ օրէնքը, այլ ռազմական ուժը»,- յայտարարել է նա՝ յաւելելով, որ սիոնիստների՝ Իրանի վրայ անպատիժ մնացած յարձակումն աւելի համարձակ եւ անսանձ է դարձրել նրանց:
«Չպէտք է կասկածել, որ անցեալ շաբաթ Դոհայի վրայ տեղի ունեցած յարձակումը մաքուր ահաբեկչութիւն էր, որն ապացոյցն է այն բանի, որ Թել Աւիւի ռեժիմը հրաժարւել է ցանկացած բարոյական եւ իրաւական սահմանափակումից։ Սակայն չպէտք է անտեսել նաեւ այն իրողութիւնը, որ այս եւ նմանատիպ այլ յարձակումները սիոնիստական ռեժիմի՝ տասնամեակների անձեռնմխելիութեան արդիւնքն է, որը հնարաւոր է դարձել արեւմտեան որոշ տէրութիւնների անվերապահ աջակցութեան շնորհիւ: Աջակցութիւն, որը ձեւաւորւել է ամերիկեան վետոների, եւրոպական առեւտրային համաձայնագրերի եւ դատական ու միջազգային համակարգերի անգործութեան շնորհիւ»,- յայտարարել է Փեզեշքիանը:
Նա նշել է, որ անհրաժեշտ է հաւաստանշել այն բոլոր մարտահրաւէրները եւ վտանգները, որոնց դէմ-յանդիման է կանգնած իսլամական աշախարհը: Ըստ նրա՝ անհրաժեշտ է մեկուսացնել ագրեսորին՝ սիոնիստական ռեժիմին, կասեցնել նրա ֆինանսաւորման եւ զինման հնարաւորութիւնը եւ նրա առաջնորդներին պատասխանատւութեան ենթարկել միջազգային դատական ատեաններում:
« Դոհայի վրայ յարձակումը ուժի ցուցադրութիւն չէր, այլ՝ յուսահտութեան եւ անճարակութեան նշան: Իր դիրքորոշմանը վստահ ռեժիմը բանակցողներին ռմբակոծելու կարիք չունի:
Սիոնիստական ռեժիմը պատերազմ է յայտարարել մեր ինքնիշխանութեան, արժանապատւութեան եւ ապագայի դէմ։ Մենք յայտարարում ենք, որ չենք ընկրկելու, չենք պառակտւելու եւ չենք լռելու։ Գազայի մոխիրներից վեր է յառնելու արդարութիւնը։ Դոհայի, Բէյրութի, Թեհրանի, Դամասկոսի եւ Սանայի աւերւած շէնքերի փլատակներից կը յայտնւի նոր կարգ. կարգ, որը հիմնւած է լինելու ոչ թէ կեղծիքի, այլ՝ իսլամական միասնութեան, ոչ թէ սիոնիստական գերիշխանութեան, այլ՝ մարդկային հաւասարութեան վրայ»,- եզրափակել է Հանրապետութեան նախագահը:
