Շանհայի համագործակցութեան կազմակերպութիւնը չի ձգձգում Երեւանի եւ Բաքւի անդամակցութեան հարցը. ՇՀԿ նախկին գլխաւոր քարտուղար
«ԱԼԻՔ» – Շանհայի համագործակցութեան կազմակերպութիւնը չի ձգձգում Հայաստանի եւ Ադրբեջանի՝ կազմակերպութեանն անդամակցութեան հարցը, այդ որոշումը կոնսենսուս է պահանջում։ Այս մասին ՏԱՍՍ-ին տւած հարցազրոյցում նշել է կազմակերպութեան նախկին գլխաւոր քարտուղար Ռաշիդ Ալիմովը,- հաղորդում է 168.am-ը:
«Նոր անդամ-պետութիւնների ընդունման ընթացակարգը յստակ սահմանւած է եւ մէկ անգամ չէ, որ անցել է ամրութեան քննութիւնը։ Ընդունման որոշումը կայացւում է կոնսենսուսով։ ՇՀԿ պատմութեան ընթացքում ոչ մի դիմում չի մերժւել։ Իւրաքանչիւր դիմում ուշադիր եւ մանրակրկիտ կերպով վերանայւում է անհատական հիմունքներով։ Կողքից կարող է տպաւորութիւն ստեղծւել, որ գործընթացը ձգձգւում է, սակայն դա այդպէս չէ»,- նշել է Ալիմովը։
Կազմակերպութեան նախկին գլխաւոր քարտուղարն ընդգծել է, որ հարցը ոչ թէ յայտերի դիտարկման արագութիւնն է, այլ այն, որ այդ գործընթացը կանգ չի առնում: «ՇՀԿ-ում արագ որոշումներ չեն ընդունում»,-նշել է նա:
