Մայր Աթոռ Սուրբ Էջմիածին. «Միքայէլ արք․Աջապահեանին ազատազրկելու վերաբերեալ անարդար դատավճիռը քաղաքական հաշւեհարդարի հերթական ապացոյցն է»
«ԱԼԻՔ» – Միքայէլ Սրբազանին երկամեայ ազատազրկման դատապարտելու կապակցութեամբ Մայր Աթոռ Սուրբ Էջմիածինը հանդէս է եկել յայտարարութեամբ, որում մասնաւորապէս նշւած է.
«Ի սկզբանէ ակնյայտ էր, որ Շիրակի թեմի առաջնորդի նկատմամբ յարուցւած քրէական հետապնդումն ունի քաղաքական դրդապատճառներ եւ իշխանութիւնների հակաեկեղեցական արշաւի բացայայտ դրսեւորումներից է։
Գերշ․ Տ․ Միքայէլ արք․ Աջապահեանին ազատազրկելու վերաբերեալ անարդար դատավճիռը քաղաքական հաշւեհարդարի հերթական ապացոյցն է, որը խօսքի եւ կրօնի ազատութեան, խտրականութեան արգելքի սկզբունքի կոպտագոյն ոտնահարում է, ժողովրդավարական հասարակարգին նետւած ուղիղ մարտահրաւէր։
Խստօրէն դատապարտելով աղաղակող ապօրինութիւնները՝ վերստին հաստատում ենք, որ Մայր Աթոռ Սուրբ Էջմիածինը հետամուտ է լինելու իրաւական, այդ թւում՝ միջազգային գործիքակազմերի կիրառմանը՝ Գերաշնորհ Տ․ Միքայէլ արք․ Աջապահեանի արդար իրաւունքները վերականգնելու համար»:
