ԱԳՆ-ն յայտարարութիւն է տարածել ՄԱԿ-ի ԱԽ թիւ 2231 բանաձեւի ժամկէտի աւարտի վերաբերեալ
«ԱԼԻՔ» – Իրանի Իսլամական Հանրապետութեան արտաքին գործերի նախարարութիւնը յայտարարութիւն է տարածել՝ անդրադառնալով ՄԱԿ-ի Անվտանգութեան խորհրդի 2231 բանաձեւի ժամկէտի աւարտին։ Հաղորդում է ԻՌՆԱ-ն:
Յայտարարութեան մէջ Իրանը պահանջել է, որ ՄԱԿ-ի գլխաւոր քարտուղարը՝ յղում անելով ՄԱԿ-ի Կանոնադրութեան 100-րդ յօդւածին, անյապաղ ուղղի ՄԱԿ-ի կայքում տեղ գտած «սխալ եւ մոլորեցնող տեղեկութիւնները»՝ աւարտւած բանաձեւերի «վերականգնման գործընթացի» վերաբերեալ։
ԱԳՆ-ն շեշտել է, որ ըստ բանաձեւի՝ 2025 թւականի յուլիսի 20-ին ընդունւած 10-ամեայ ժամկէտը լրանում է այսօր՝ հոկտեմբերի 18-ին, եւ այսօրւանից բոլոր դրոյթներն ու սահմանափակումները համարւում են աւարտւած։
Նախարարութիւնը յայտարարել է, որ Իրանի միջուկային հարցը, որը մինչ այժմ քննարկւում էր Միջուկային զէնքի չտարածման պայմանագրի շրջանակում, պէտք է դուրս բերւի Անվտանգութեան խորհրդի օրակարգից, եւ Իրանին պէտք է վերաբերւել ինչպէս միջուկային զէնք չունեցող որեւէ երկրի՝ Միջուկային զէնքի չտարածման պայմանագրի (NPT) շրջանակում։
ԱԳՆ-ն շետել է՝ Իրանի միջուկային ծրագիրը լիովին խաղաղ բնոյթ ունի, եւ Ատոմային էներգիայի միջազգային գործակալութիւնը երբեք չի հրապարակել զեկոյց, որը կը հակասէր այս փաստին։ Իրանը նաեւ նշել է, որ չնայած իր կամաւոր պարտաւորութիւններին՝ Միցեալ Նահանգները եւ եւրոպական երեք երկրները (Բրիտանիա, Ֆրանսիա, Գերմանիա) խախտել են իրենց խոստումները եւ շարունակել են կիրառել «անօրինական ու անարդարացի պատժամիջոցներ»։
Յայտարարութեան մէջ ԱԳՆ-ն քննադատել է եւրոպական երեք երկրների՝ «անօրինական քայլը»՝ փորձելով վերադարձնել ՄԱԿ-ի չեղարկւած բանաձեւերը՝ ԱՄՆ-ի պահանջով։ ԱԳն-ն յայտարարել է, որ այդ գործողութիւնները որեւէ իրաւական ուժ չունեն եւ չեն կարող ազդել 2231 բանաձեւի իրաւական վաւերականութեան վրայ։
ԱԳՆ-ն ընդգծել է, որ Անվտանգութեան խորհուրդը երբեւէ որոշում չի ընդունել այդ բանաձեւերի վերականգնման վերաբերեալ՝ Չինաստանի եւ Ռուսաստանի բացայայտ ընդդիմութեան պատճառով։
ԱԳՆ-ն նաեւ պահանջել է, որ ՄԱԿ-ի քարտուղարութիւնը «չհաստատի եւ չօրինականացնի» եւրոպական այդ երկրների գործողութիւնները եւ անյապաղ հեռացնի իր կայքից որեւէ տեղեկութիւն, որը վերաբերում է պատժամիջոցային կոմիտէի կամ փորձագէտների խմբի հնարաւոր վերակազմաւորմանը։
Յայտարարութեան վերջին հատւածում Իրանը խստօրէն դատապարտել է ԱՄՆ-ի եւ Իսրայէլի զինւած ագրեսիան Իրանի տարածքային ամբողջականութեան եւ խաղաղ միջուկային օբիեկտների նկատմամբ՝ դրանք որակելով որպէս «ծանր յանցագործութիւններ միջազգային իրաւունքի դէմ»։
ԱԳՆ-ն շնորհակալութիւն է յայտնել Չինաստանին, Ռուսաստանին, ինչպէս նաեւ Ալժիրին եւ Պակիստանին՝ Անվտանգութեան խորհրդում Իրանի դիրքորոշումը պաշտպանելու համար, եւ ընդգծել է իր յանձնառութիւնը՝ շարունակելու դիւանագիտական ուղին՝ պաշտպանելով Իրանի օրինական իրաւունքներն ու շահերը խաղաղ միջուկային էներգիայի ոլորտում։
