Ռուբէն Վարդանեանն ազդարարում է «Աւրորա»-ին իր ակտիւ մասնակցութեան աւարտը

«Աւրորա» մարդասիրական նախաձեռնութեան գործունէութեան 10-ամեակի կապակցութեամբ նախաձեռնութեան համահիմնադիր, ներկայում Բաքւում ապօրինի կալանքի տակ պահւող բարերար եւ մարդասէր Ռուբէն Վարդանեանը, կնոջ՝ Վերոնիկա Զոնաբենդի միջոցով, ուղերձ է փոխանցել «Աւրորա»-ի համայնքին:
Ստորեւ ներկայացւում է ուղերձը.
«Սիրելի՛ ընկերներ, աջակիցներ եւ գործընկերներ,
Նախեւառաջ՝ շնորհակալ եմ։ Ձեր հաւատքը, առատաձեռնութիւնն ու վստահութիւնը հնարաւոր դարձրին այն, ինչը մի ժամանակ անհնար էր թւում։
«Աւրորա» մարդասիրական նախաձեռնութեան 10-ամեակի նախօրէին, անձնապէս ցանկանում եմ խորին երախտագիտութիւնս յայտնել բոլոր այն ընկերներին ու բարերարներին, որոնք հաւատացին Հայաստանում ծնունդ առած՝ մարդասիրական համաշխարհային նախաձեռնութիւն սկսելու տեսլականին, վստահեցին ինձ եւ աջակցեցին իրենց առատաձեռնութեամբ: Հէնց նրանց նւիրւածութիւնը վառեց այն կայծը, որն ի վերջոյ վերածւեց «Աւրորա» շարժման։
Երբ 2014 թւականին մեր ընտանիքն առաջին անգամ ձեռնամուխ եղաւ «Աւրորա» մարդասիրական նախաձեռնութեան եւ «Աւրորա» մարդասիրական մրցանակի կեանքի կոչմանը, մենք այն պատկերացնում էինք որպէս ութ տարւայ ճանապարհ՝ մինչեւ 2023 թւականը՝ յուսալով, որ «Աւրորա»-ն կը վերածւի միջազգային շարժման՝ ունենալով արմատներ Հայաստանում եւ երախտագիտութեան գործուն առաքելութիւն, որը կը շարունակեն ուրիշները։
Համավարակի պատճառով մեր նախանշած ժամկէտը երկարաձգւեց մինչեւ 2024 թւականը, երբ Երեւանում բացւեց Աւրորա Մարդիգանեանին եւ Հայոց Ցեղասպանութեան նահատակներին նւիրւած յուշակոթող-քանդակը՝ որպէս երախտագիտութեան եւ յոյսի խորհրդանիշ։ Այս իրադարձութիւնը դարձաւ նաեւ հանգրւանային՝ ազդարարելով իմ ակտիւ մասնակցութեան աւարտը։
Ես խորապէս շնորհակալ եմ Նուբարին եւ Վարդանին, ովքեր ի սկզբանէ աջակցեցին նախաձեռնութեանը որպէս համահիմնադիրներ։ Առանձնայատուկ երախտագիտութիւնս եմ յայտնում Նուբարին եւ նրա ընտանիքին՝ 2023 թւականից յետոյ «Աւրորա»-ի առաջնորդութիւնը ստանձնելու եւ այն յաջորդ փուլ տանելու համար։ Յուսով եմ, որ Միացեալ Նահանգներում տեղակայւած լինելու դէպքում էլ այն կը շարունակի պահպանել իր հայկական արմատները։
Շնորհակալութիւն եմ յայտնում խորհրդի եւ ընտրող յանձնաժողովի բոլոր անդամներին` «Աւրորա»-ի առաքելութեանը նւիրւած լինելու, քրտնաջան աշխատանքի եւ յանձնառութեան, ինչպէս նաեւ՝ այն իսկապէս եզակի երեւոյթ դարձնելու գործում ձեր աջակցութեան համար։
«Աւրորա»-ի հիմքում դրւած գաղափարը՝ Երախտագիտութիւնը, մարդկային հիմնարար արժէք է։ Մեկնաբանելով Ս. Ֆրանցիսկոսի մտքերը՝ կը ցանկանայի ընդգծել, որ «երախտագիտութիւնն է ծնում ամենաիսկական ցնծութիւնը»։ Եւ իսկապէս, գործուն երախտագիտութիւնը, կամ՝ «Երախտագիտութիւնն՝ ի գործ»-ը առողջ ու կարեկից ցանկացած համայնքի առանցքում է։
Գտնւելով այստեղ՝ Բաքւում, ես աւելի քան երբեւէ ոգեշնչւած եմ «Աւրորա» մրցանակի դափնեկիրներով եւ «Աւրորա»-ի աւելի լայն համայնքով՝ մարդկանցով, որոնք առանց ճանաչման կամ ուշադրութեան արժանանալու ձգտման ծառայում են ուրիշներին։ Հէնց այս անխոնջ ջանքերն են մարմնաւորում «Աւրորա»-ի ոգին։ Դուք իսկական հերոսներ էք, եւ «Աւրորա»-ի հիմնադիրները մշտապէս յոյս են փայփայել, որ շատերը կը հետեւեն ձեր օրինակին:
Նախաձեռնութեան 10-ամեակի կապակցութեամբ «Աւրորա»-ին մաղթում եմ շարունակական յաջողութիւններ՝ խորը հաւատով, որ երախտագիտութիւնը կը շարունակւի արտայայտւել գործով»:
News.am



