Վիգէն Յակոբեան. «Նիկոլ Փաշինեանի մէջ վախն է խօսում. ակնարկում է մոլդովական տարբերակի մասին»

«ԱԼԻՔ» – Նոյեմբերի 13-ին ՀՀ ԱԺ-ում պետական բիւջէի նախագծի քննարկման ժամանակ Նիկոլ Փաշինեանն իր եզրափակիչ ելոյթում կրկին անդրադարձել էր նախկին իշխանութեանը, Արցախին ու առհասարակ ընդդիմութեանը։

«Հայաստանում ընդդիմութիւնը, ըստ երեւոյթին, ազդեցութեան գործակալ է օտարերկրեայ պետութիւնների համար։ Հայաստանը կոնկրետ մի երկրի գրպանում է յայտնւել մի գործիքով՝ Ղարաբաղի հարցով։

Մենք պիտի որոշում կայացնենք՝ մենք հանդուրժո՞ւմ ենք մեր սրբութեան սրբոցում ուրիշ երկրների ազդեցութեան գործակալների ցանց։ Իմ պատասխանն է՝ ոչ, որովհետեւ հակառակ դէպքում ինչի է այսպէս հիստերիա, որովհետեւ վերջին շանսն է մեր պետութիւնը յետ տանել, տեղաւորել այն գրպանում, որից մենք դուրս ենք եկել»,- նշել էր Նիկոլ Փաշինեանը՝ յաւելելով, որ 2-րդ եւ 3-րդ նախագահների ուժերը չպէտք է լինեն խորհրդարանում՝ «պահը հասունացել է»։

Ի՞նչ է նշանակում Նիկոլ Փաշինեանի այս ելոյթը երկրի բարձր ամբիոնից, նոր հրահանգ իրաւապահների՞ն, նա ի՞նչ վստահութիւն ունի, որ նախկին իշխանութիւնների ուժերը չպէտք է լինեն գալիք խորհրդարանում։

Քաղաքական վերլուծաբան, քաղտեխնոլոգ Վիգէն Յակոբեանի կարծիքով՝ եթէ Նիկոլ Փաշինեանն ինչ-որ բանի վերաբերեալ խօսում է, դա դեռ չի նշանակում, որ հէնց այդպէս է լինելու. նա աւելի շուտ իր վախերն է արտայայտում։

«Սովորաբար խօսքը միշտ վերաբերում է այն երեւոյթներին կամ հաւաքական ուժերին, որոնք իրենցից ինչ-որ բան են ներկայացնում կամ վտանգ են ներկայացնում Նիկոլ Փաշինեանի իշխանութեան համար։ Տարօրինակ կը լինէր, եթէ Նիկոլ Փաշինեանն ԱԺ ամբիոնից խօսեր այնպիսի քաղաքական ուժերի մասին, որոնց իշխանութեան գալու շանսերը մօտ են զրոյի։ Իրականում Նիկոլ Փաշինեանի մէջ վախն է խօսում՝ առաջիկայ խորհրդարանական ընտրութիւնների արդիւնքների շուրջ։ Նա շատ լաւ հասկանում է, որ այդ ընտրութիւնները բաւականին պրոբլեմատիկ են լինելու։ Սա ցոյց են տալիս տարբեր սոցհարցումներ, այդ թւում՝ վերջին 3 տարիների ՏԻՄ ընտրութիւնների արդիւնքները, այնպէս որ, սա պրոբլեմատիկ է լինելու»,- 168.am-ի հետ զրոյցում նշել է Վիգէն Յակոբեանը։

Նրա բնորոշմամբ՝ Նիկոլ Փաշինեանի ելոյթն ընդհանուր առմամբ նաեւ ցուցում էր իրաւապահներին, բայց այստեղ ոչ թէ ակնարկում է անհատների նկատմամբ բռնաճնշումների իրականացումը, այլ մոլդովական տարբերակի մասին։ Մոլդովայում էլ նոյն պատճառաբանութեամբ որոշ կուսակցութիւնների, օրինակ՝ «գործակալների, ազդեցութեան գործակալների» եւ այլն, ընտրութիւններից մի քանի օր առաջ չէին գրանցում։

«Կարծում եմ՝ Նիկոլ Փաշինեանն աւելի շուտ սրա մասին էր ակնարկում։ Եթէ նա ասում է, որ չի ցանկանում, որ նախկին նախագահների ուժերը լինեն խորհրդարանում, լաւ հասկանում է, որ միակ ռէալ ճանապարհը, որը կարող է իր սպասած արդիւնքները տալ, այն է, եթէ գնում է մոլդովական տարբերակով եւ ուղղակիօրէն արգելում է որոշ կուսակցութիւնների գործունէութիւնը կամ ընտրութիւններին մասնակցելը»,- նկատել է քաղտեխնոլոգը։

Յակոբեանի խօսքով՝ Նիկոլ Փաշինեանին այսկերպ գործելու «թեւեր է տալիս» եւրոպական բիւրակրատիան։ Եւ պատահական չէ, որ Նիկոլ Փաշինեանից սկսած, մինչեւ Անվտանգութեան խորհրդի քարտուղար, ԱԺ փոխնախագահներ՝ հանդիպում են Եւրամիութեան դեսպանների հետ։

«Եւրամիութեան դեսպանները «ընդհանուր» ճամպրուկով մի պաշտօնեայի մօտից տեղափոխւում են մէկ այլ պաշտօնեայի մօտ հանդիպման, նրա մօտից էլ՝ մէկ այլ մարդու մօտ։ Կարծում եմ՝ խնդիրն այն է, որ փորձում են Եւրամիութեան հետ պայմանաւորւել, որ եթէ, օրինակ, անում են բռնաճնշումներ՝ «մոլդովական» սցենարը, ապա Եւրամիութիւնը պէտք է դրա վրայ աչք փակի։ Մեզ մօտ ժողովրդավարութեան պաշտպաններն Արեւմուտքի եւրոպական մասն է, ժողովրդավարութեան ստանդարտների մասին Ռուսաստանը կամ արաբական երկրները չեն խօսում։ Այսինքն՝ իշխանութիւնը փորձում է երաշխաւորել իր գործողութիւնները, որպէսզի դրա շուրջ որեւէ աղմուկ չբարձրանայ։

Ինչի՞ դիմաց են դա անում, սա հասկանալի է՝ եթէ Հայաստանը դառնում է պրոբլեմատիկ երկիր Ռուսաստանի, Իրանի համար։ Սրա դիմաց իրենք ամէն ինչի առաջ աչք կը փակեն»,- նշել է նա։

Վիգէն Յակոբեանը նաեւ շեշտեց՝ եթէ ՀՀ իշխանութեան երաշխաւորը լինէր սեփական ամուր դիրքերը ներքաղաքական դաշտում կամ հասարակական դաշտում, ապա իրենց քաղաքական հետապնդումները դրսից երաշխաւորելու կարիք չէին ունենայ։

«Ներսում իրենք անվստահ են, փորձում են հնարաւորինս իրենց մրցակիցներին վնասազերծել եւ փորձում են ժողովրդավարութեան շղարշի երաշխիքները ստանալ նրանցից, ովքեր սովորաբար որոշում են՝ ընտրութիւնները ժողովրդավա՞ր են, թէ՞ ոչ»,- ընդգծեց Վիգէն Յակոբեանը։

Զրոյցը՝ ԶՒԱՐԹ ԽԱՉԱՏՐԵԱՆԻ