Գերմանացիները վախենում են, որ Եւրամիութիւնը կարող է դադարել գոյութիւն ունենալուց
«ԱԼԻՔ» – «Երկրորդ համաշխարհային պատերազմի աւարտից ի վեր առաջին անգամ Միացեալ Նահանգներն այլեւս եւրոպացիների կողմից չէ: Նրանք այլեւս Ուկրաինայի կողմից չեն, մի երկրի, որի դէմ միջազգային իրաւունքը խախտող դաժան ոչնչացման պատերազմ է մղւում»: Այս մասին ըստ News.am-ի՝ Redaktionsnetzwerk Deutschland-ին տւած հարցազրոյցում յայտարարել է «Քրիստոնեայ-դեմոկրատական միութեան» միջազգային քաղաքականութեան փորձագէտ եւ Բունդեսթագում CDU/CSU խմբակցութեան փոխնախագահ Նորբերտ Ռիոտգէնը:
Ռիոտգէնի համոզմամբ՝ եթէ ԱՄՆ այս ռազմավարութիւնը յաջողութեամբ պսակւի, «Եւրամիութիւնն այլեւս չի գոյութիւն ունենայ»:
Գերմանիայի արտգործնախարար Եօհան Վադեֆուլը մեկնաբանել է եւրոպական երկրներում խօսքի ազատութեան վերաբերեալ ԱՄՆ քննադատութիւնը: Նա նշել է, որ կարծում չի, թէ «այստեղ որեւէ մէկը պէտք է մեզ (եւրոպացիներին – ԽՄԲ.) խորհուրդներ տայ»:
ԱՄՆ ազգային անվտանգութեան նոր ռազմավարութեան լոյսի ներքոյ «Եւրոպան հնարաւորութիւն ունի ձեւաւորելու իր սեփական ապագան», եւ այն «չպէտք է ձեռքից բաց թողնել»,- Funke մեդիա խմբին յայտնել է ընդդիմադիր «Կանաչների» կուսակցութեան համանախագահ Ֆրանցիսկա Բրանտները։
ԱՄՆ ազգային անվտանգութեան նոր ռազմավարութիւնն, ի թիւս այլ բաների, խօսում է «Եւրոպայի ներկայիս կուրսի նկատմամբ եւրոպական ազգերի ներսում» դիմադրութիւնը զարգացնելու անհրաժեշտութեան մասին։
