Լիլիթ Գալստեան. «Սա իշխող վարչախմբի թէ՛ քաղաքական, եւ մանաւանդ՝ բարոյական պարտութիւնն էր»
«ԱԼԻՔ» – «Որքան էլ Փաշինեանը փորձեց փոխել սցենարը եւ եկեղեցու դէմ իր սանձազերծած ասպատակութիւնը ներկայացնել որպէս եկեղեցու նեքին մաքրման գործընթաց, այնուամենայնիւ, սա իշխող վարչախմբի թէ՛ քաղաքական, եւ մանաւանդ՝ ԲԱՐՈՅԱԿԱՆ պարտութիւնն էր՝ ԱԱԾ-ի եւ տարագոյն ոստիկանների աննախադէպ բազմութեան մասնակցութեամբ»: Այս մասին ֆէյսբուքեան իր էջում գրել է ՀՅԴ Բիւրոյի անդամ, ՀՀ ԱԺ «Հայաստան» խմբակցութեան պատգամաւոր Լիլիթ Գալստեանը՝ անդրադառնալով դեկտեմբերի 18-ին ի պաշտպանութիւն Եկեղեցու եւ Վեհափառ Հայրապետի Մայր Աթոռում կազմակերպւած ժողովրդական մեծ հաւաքի ընթացքում Փաշինեանի կողմնակիցների եւ տիրադաւ հոգեւորականների խայտառակութեանը:
«Այսօր յաղթեց ազգային նկարագիր ունեցող հաւատաւոր հայ մարդկանց ՄԻԱՍՆՈՒԹԻՒՆԸ։ Ցաւօք, պարտւեց ՊԵՏՈՒԹԻՒՆԸ։ Թէեւ Նիկոլը պետութիւնը չէ!!!!, բայց նրա հասցրած հարւածները սպիներ են մեր հաւաքական արժանապատւութեանը ու ծանր վէրքեր մեր քաղաքակրթական էութեանը։
Որքան տհաս, բարոյապէս անկեալ եւ քաղաքականապէս սնանկ պիտի լինել՝ չհասկանալու համար, որ Հայ Առաքելական Սուրբ Եկեղեցու ասպատակութիւնը ասպատակութիւն է մեր յիշողութեան, ինքնութեան, մեր միասնականութեան ու պետականութեան դէմ։
Սահմռկեցուցիչ էր Մայր Տաճարի երկու կողմերում տեսնել փոխադարձ ատելութեան վիհը, հային հայի դէմ հանածի սատանայական խրախճանքը…
Սա ինքնաոչնչացման ճանապարհն է, արիւնից չխորշող վարչախմբի ձեռագիրը, որ կասեցւեց եղբայրասպանութիւնը մերժող հաւատաւոր հայ մարդկանց կողմից։ Սա թշնամու օրակարգ է, որը գոյութեան իրաւունք չունի։
Այսօր յաղթեց միասնականութիւնը, սատանան չմտաւ մեր սուրբ տարածքներ։
Բայց մեր ինքնութեան դէմ այս նողկալի եւ հակապետական ծրագիրը կասեցնելու խնդիրը դեռ չենք լուծել։
Միասին կարող ենք։
Երեսուն արծաթով ծախւած հայրենադաւեր, յիշէք, որ դեռ ապրելու էք այս հողի վրայ, յիշէք, որ կայ հատուցման ոսկէ կանոնը։ Իսկ ձեր ուրացումը ՏԻԵԶԵՐԱԿԱՆ է…»,- յաւելել է նա:
