Բագրատ եւ Արշակ Սրբազանների յայտարարութիւնը. «Քստմնելի էր արշաւորդների առաջին շարքերում տեսնել տիրադաւութիւնն իրենց ճակատին դաջած հոգեւորականներին»
«ԱԼԻՔ» – «Հակաեկեղեցական հրոսակախումբը իր տխրահռչակ պարագլխի բացայայտ հովանաւորութեամբ դեկտեմբերի 18-ին կրկին ներխուժեց Մայր Աթոռ, փորձելով ասպատակել նւիրական սրբավայրը»: Այս մասին ասւած է Բագարատ արքեպիսկոպոս Գալստանեանի եւ Արշակ արքեպիստոպոս Խաչատրեանի՝ ՀՀ ԱԱԾ մեկուսարանից հրապարակած յայտարարութեան մէջ:
Յայտարարութեան մէջ մասնաւորապէս նշւած է.
«Քստմնելի էր արշաւորդների առաջին շարքերում տեսնել տիրադաւութիւնն իրենց ճակատին որպէս աղւեսադրոշմ դաջած դեռեւս բարձրաստիճան հոգեւորականներին, որոնք ոստիկանական շարքերի յետեւում էին ծւարել՝ շփոթւած եւ շւարած հայեացքներով։
Ակնյայտ է, որ իրենք եւս հասկանում են, որ ընտրել են ինքնաոչնչացման եւ ինքնաժխտման ճանապարհը՝ խամաճիկ դառնալով խառնակիչ տիկնիկավարի ձեռքին, որը կարճ ժամանակ յետոյ իրենց եւս զոհաբերելու է ատելութեան եւ թշնամութեան իր արիւնածարաւ կուռքին։
Մայր տաճարի պատերը շատ ասպատակողների են տեսել՝ սա էլ տեսան (բոլորն էլ փոշիացել են) եւ այդ առումով դեկտեմբերի 18-ը կը մնայ մեր նորագոյն պատմութեան խայտառակ ու ամօթալի էջերից մէկը։
Այս ամօթալի պատկերի դիմաց առանձնակի հիացմունքով ենք անդրադառնում մեր ուխտապահ եկեղեցականներին եւ հաւատացեալ ժողովրդի խիզախ կեցւածքին, որը եւս մէկ անգամ փաստեց, որ հայ մարդու մէջ չի կարող սպանւել ինքնութեան զգացումը՝ անկախ հալածանքների սաստկութիւնից։
Մեր եւ կալանաւորւած մեր միւս հոգեւոր եղբայրների՝ Միքայէլ եւ Մկրտիչ Սրբազանների անունից, մեր հաւատարմութիւնն ենք յայտնում Ամենայն Հայոց Հայրապետին եւ Լուսաւորչի գահին, եւ մեր զօրակցութիւնը զինւորեալ եւ նւիրեալ հոգեւոր դասին եւ ժողովրդին։ Առանձնակի ջերմութեամբ աղօթում ենք Տէր Վրթանէս քհնյ. Բաղալեանի շուտափոյթ ապաքինման համար։
Թող մեր տէրը անխախտ ու անսասան պահի Մայր աթոռ Սուրբ Էջմիածինը, մեր համբուրելի եւ խոցւած հայրենիքն ու ժողովրդին, որպէսզի մեր կեանքից մեկնի մէգը, մերժւի մառախուղը, վերանայ մութը, չքանայ չարիքը, հալածւեն յուսահատութիւնները եւ թագաւորի տիրոջ ամենակարող ձեռքը»։
