Իսրայէլի արտգործնախարարն առաջին անգամ այցելում է Սոմալիլենդ՝ տարածքի պետականութեան ճանաչումից յետոյ

«ԱԼԻՔ» – Իսրայէլի արտգործնախարար Գիդէոն Սաարը երեքշաբթի ժամանել է Սոմալիլենդ, ինչը Իսրայէլի բարձրաստիճան պաշտօնեայի առաջին այցն է, երբ երկիրը պաշտօնապէս ճանաչեց Սոմալիի անջատւած տարածքը որպէս ինքնիշխան պետութիւն: Հաղորդում է News.am-ը՝ Associated Press-ին յղումով:

Իսրայէլի որոշումը արժանացել է Աֆրիկեան Միութեան եւ այլ երկրների քննադատութեանը կամ մերժմանը։ Սոմալին ինքը՝ երեքշաբթի հրապարակած յայտարարութեան մէջ, յայտարարել է, որ «ամենախիստ կերպով դատապարտում է Գիդէոն Սաարի չարտօնւած ներխուժումը»՝ նրա այցը Սոմալիլենդ անւանելով «անընդունելի միջամտութիւն Սոմալիի ներքին գործերին»։

Սոմալիլենդը Սոմալիից անկախութիւն է հռչակել 1991 թւականին՝ Արեւելաաֆրիկեան երկրում ընթացող տեւական հակամարտութեան ժամանակ։ Չնայած սեփական կառավարութեան եւ արժոյթի առկայութեանը, Սոմալիլենդը երբեք որեւէ պետութիւն չի ճանաչել։ Սոմալիլենդի տեղեկատւութեան նախարարութիւնը սոցիալական ցանցերում յայտնել է, որ Սաարին եւ նրա պատւիրակութեանը Հարգէյսա օդանաւակայանում վայրէջք կատարելիս դիմաւորել են Սոմալիլենդի կաբինետի բարձրաստիճան անդամները։

Նախարարութիւնն այցը անւանել է երկկողմ յարաբերութիւնների կարեւորագոյն հանգրւան։ Սոմալիի դաշնային կառավարութիւնը պնդում է, որ Սոմալիլենդը մնում է Սոմալիի տարածքի անբաժանելի մասը եւ զգուշացնում է, որ ճանաչումը խաթարում է Սոմալիի ինքնիշխանութիւնն ու տարածքային ամբողջականութիւնը։

Իսրայէլի դեկտեմբերի 26-ի յայտարարութիւնը, որով նա ճանաչում է Սոմալիլենդը որպէս անկախ եւ ինքնիշխան պետութիւն, արագօրէն դատապարտել են բազմաթիւ երկրներ։ Աւելի քան 20 երկիր, հիմնականում Մերձաւոր Արեւելքի եւ Աֆրիկայի, ինչպէս նաեւ Իսլամական համագործակցութեան կազմակերպութիւնը, մերժել են Իսրայէլի քայլը։ ԱՄՆ եւ Իսրայէլի պաշտօնեաները անցեալ տարի Associated Press-ին յայտնել էին, որ Իսրայէլը խնդրել է Սոմալիլենդին ընդունել պաղեստինցիներին Գազայից՝ ԱՄՆ նախագահ Դոնալդ Թրամփի՝ տարածքը վերաբնակեցնելու ծրագրի շրջանակում։ ԱՄՆ-ն այդ ժամանակւանից ի վեր հրաժարւել է նշւած ծրագրից, եւ Պետքարտուղարութիւնը յայտարարել է, որ շարունակում է ճանաչել Սոմալիի տարածքային ամբողջականութիւնը, «որը ներառում է նաեւ Սոմալիլենդի տարածքը»։