Բաղայի. «Իրան-ԱՄՆ ժամանակաւոր համաձայնութեան վերաբերեալ շրջանառւող լուրերը ենթադրութիւններ են»

«ԱԼԻՔ» – ԱԳ նախարարութեան ներկայացուցիչ Էսմայիլ Բաղային, լրագրողների հետ ունեցած իր շաբաթական մամուլի ասուլիսի ժամանակ անդրադառնալով Իրանի եւ Միացեալ Նահանգների միջեւ հնարաւոր «ժամանակաւոր համաձայնութեան» վերաբերեալ տարածւած լուրերին, յայտարարել է, որ շրջանառւող ենթադրութիւնները ոչ մէկը պաշտօնապէս չի հաստատւում։

Բաղային նշել է, որ բանակցութիւնների ընթացքին տարբեր ենթադրութիւններ են շրջանառւում բանակցային գործընթացի ապագայ ձեւաչափի վերաբերեալ, սակայն Իրանը ներկայ փուլում գտնւում է իր դիրքորոշումները վերամշակելու հանգրւանում։ Իրանը յայտնել է նաեւ բանակցութիւններից ունեցած իր ակնկալիքների մասին, ինչը մօտ օրերին, հնարաւոր բանակցութիւններից յետոյ, միայն կը կարողանայ խօսել արդիւնքների մասին: 

Բաղային յայտնել է նաեւ, որ ցանկացած բանակցային տեքստ իր բնոյթով համատեղ աշխատանքի արդիւնք է, միաժամանակ վերահաստատելով, որ Իրանի դիրքորոշումը ամերիկեան «անարդար պատժամիջոցների» վերաբերեալ յստակ է, իսկ Վաշինգտոնի մօտեցումները՝ նոյնպէս յայտնի։

Անդրադառնալով Ուիթքոֆի վերջին յայտարարութիւններին՝ որոնց համաձայն Իրանը «իբր թէ» մէկ շաբաթ հեռու է միջուկային զէնք ձեռք բերելուց, Բաղային նշել է, որ նման կարգի հակասական ու ճնշման բնոյթ ունեցող արտայայտութիւնները նոր երեւոյթ չեն, եւ գնահատականը թողնում է Իրանի գիտակից հասարակութեան դատողութեանը։

Խօսնակը նշել է, որ Իրանը լուրջ է տրամադրւած բանակցութիւնների հարցում, եւ դիւանագիտական յաջողութիւնները բանակցային գործընթացներում, չեն լինում միայն կողմերից մէկի թելադրանքով: «Իրանը շարունակելու է միջուկային իրաւունքների եւ պատժամիջոցների վերացման ուղղութեամբ իր պահանջները պաշտպանել՝ վստահ լինելով դրանց օրինականութեան հարցում»։

ԱԳՆ ներկայացուցիչը նաեւ յայտարարել է, որ Ատոմային էներգիայի միջազգային գործակալութեան հետ համագործակցութեան հարցով նախապայմաններ չկան, սակայն վնասւած միջուկային ենթակառուցւածքների «այցելութիւն» եզրը իրաւական եւ գործնական առումով տարբեր մօտեցում է պահանջում:

Բաղային ընդգծել է. «Իրանական մշակոյթում ստրկացումն ընդունելի չէ, եւ որ Իրանի ժողովուրդն իր պատմութեան ընթացքում բազմիցս ապացուցել է՝ արժանապատւութիւնը, ինքնիշխանութիւնն ու տարածքային ամբողջականութիւնը սակարկելի չեն»։