Մեծ Բրիտանիայի խոհրդարանում մեկնարկել է Արցախի վերաբերեալ խորհրդարանական հետաքննութիւն
Հայ Դատի Մեծ Բրիտանիայի յանձնախմբի փոխանցմամբ փետրւարի 23-ին Մեծ Բրիտանիայի խորհրդարանում տեղի է ունեցել «Ջնջելով անցեալը. մշակութային ժառանգութեան ոչնչացում» խորագրով խորհրդարանական հետաքննութեան գործընթացի մեկնարկը, որի նպատակն է ուսումնասիրել 2023 թւականից ի վեր Արցախի (Լեռնային Ղարաբաղ) հայկական ժառանգութեան ոչնչացումը, մինչ օրս ձեռնարկւած իրաւական արձագանքները, ինչպէս նաեւ արդարութեան եւ հաշւետւողականութեան հասնելու հնարաւոր ուղիները։ Առաջին նիստում ելոյթ է ունեցել «Արցախի միութեան» նախագահ, Արցախի Հանրապետութեան Մարդու իրաւունքների նախկին պաշտպան Արտակ Բեգլարեանը։
Հետաքննութիւնն իրականացնում են Միջազգային փաստաբանների ասոցիացիայի Մարդու իրաւունքների ինստիտուտը (IBAHRI)` համագործակցութեամբ Միջազգային իրաւունքի, արդարադատութեան եւ հաշւետւողականութեան հարցերով համակուսակցական խորհրդարանական խմբի եւ Հայաստանի հարցերով համակուսակցական խորհրդարանական խմբի։
Բազմակուսակցական յանձնախումբը նախագահում է խորհրդարանական Բրենդան Օ’Հարան, անդամակցում են նաեւ բարոնուհի Հելենա Քենեդին, խորհրդարանականներ Ջոն Ուիթինգդէյլը, Ջեսիկա Մորդենը, Լորդ Մաք’Իննեսը, Լորդ Ալթոնը եւ բարոնուհի Հուպերը։ Աշխատանքներին աջակցում է IBAHRI ծրագրերի համակարգող Էյն Մակդոնալդը։
Քննութիւնը ընթանալու է հինգ փուլով՝ քննարկելով.
- Մշակութային ոչնչացման վերաբերեալ ապացոյցների եւ առկայ իրաւական արձագանքների քարտէզագրում։
- Դիմումների ընդունման գործընթացի մեկնարկ։
- Հանրային լսումներ՝ փորձագէտների եւ վկաների մասնակցութեամբ։
- Վերջնական զեկոյցի հրապարակում։
- Շարունակական քննարկում Մեծ Բրիտանիայի կառավարութեան եւ միջազգային հաստատութիւնների հետ։
ՀՅԴ Հայ Դատի Կենտրոնական գրասենեակ
24 փետրւար 2026 թ.
