«Արժանապատիւ հայերի միութիւն» ՀԿ-ն իր աջակցութիւնն է յայտնել «Հայաստան» դաշինքին

Յայտարարութիւն

 

«Արժանապատիւ հայերի միութիւն» ՀԿ-ն յայտարարութիւն է տարածել, որը ներկայացնում ենք ստորեւ.

«Սիրելի՛ հայրենակիցներ,

Հայաստանը կանգնած է պատմական նշանակութեան ընտրութեան առաջ։ Մեր պետութեան անվտանգութիւնը, ազգային արժանապատւութիւնը, սահմանների պաշտպանութիւնը եւ սերունդների ապագան կախւած են այն որոշումներից, որոնք կայացւում են այսօր։

«Արժանապատիւ հայերի միութիւն» հասարակական կազմակերպութիւնը, գնահատելով երկրի առջեւ ծառացած մարտահրաւէրները եւ դրանց յաղթահարման համար անհրաժեշտ առաջնորդական կարողութիւնները, յայտարարում է իր աջակցութիւնը «Հայաստան» դաշինքին։

Մենք համոզւած ենք, որ այս դժւար ժամանակաշրջանում Հայաստանին անհրաժեշտ են փորձառութիւն, վճռականութիւն, պետական մտածողութիւն եւ ուժեղ կամք։ Այդ յատկանիշները տարիների ընթացքում դրսեւորել է Հայաստանի Հանրապետութեան երկրորդ նախագահ Ռոբերտ Քոչարեանը, որը ղեկավարել է երկիրը բարդ ժամանակներում, կայացրել պատասխանատու որոշումներ եւ իր գործունէութեամբ ապացուցել պետական կառավարման փորձի կարեւորութիւնը։

Այսօր, առաւել քան երբեւէ, մեր ժողովրդին անհրաժեշտ է ազգային միասնութիւն, վստահութիւն սեփական ուժերի նկատմամբ եւ պատրաստակամութիւն՝ պաշտպանելու Հայաստանի ու Արցախի հայութեան կենսական շահերը։

Մենք կոչ ենք անում Հայաստանի Հանրապետութեան բոլոր քաղաքացիներին չմնալ անտարբեր, մասնակցել հանրային եւ քաղաքական կեանքին, համախմբւել յանուն ուժեղ, անվտանգ եւ արժանապատիւ Հայաստանի եւ իրենց աջակցութիւնը յայտնել «Հայաստան» դաշինքին։

Մեր երկրի ապագան կերտւում է ոչ թէ յուսահատութեամբ, այլ կամքով, պատասխանատւութեամբ եւ պայքարելու պատրաստակամութեամբ։

Թող իւրաքանչիւր հայ իր ներդրումն ունենայ ազգային վերածննդի եւ պետականութեան ամրապնդման գործում։

Միասնութեամբ՝ յանուն հզօր եւ արժանապատիւ Հայաստանի»։