Հայ-ֆրանսիական յարաբերութիւնները ձեր եւ Փաշինեանի պատմական ձեռքբերումը չէ

ՀՅԴ Հայաստանի ԳՄ ներկայացուցիչ, ՀՀ ԱԺ «Հայաստան» խմբակցութեան պատգամաւոր Իշխան Սաղաթէլեանը գրում է.

«Յարգելի՛ պարոն Մակրոն,

հայ-ֆրանսիական ջերմ ու եղբայրական յարաբերութիւնները Ձեր  եւ Փաշինեանի պատմական ձեռքբերումը չէ:

Ֆրանսիայի Հանրապետութեան բոլոր նախագահները տարբեր առիթներով, այդ թւում` նաեւ պետական այցերով, բազմաթիւ անգամներ ժամանել են Հայաստան։

Ձեզ ժառանգութիւն մնացած ջերմ ու ամուր յարաբերութիւնները տասնամեակների աշխատանքի արդիւնք են,  որը դուք եւ Փաշինեանը ցանկանում էք ոչ միայն սեփականաշնորհել, այլ նաեւ աղաւաղել։

Ձեր աշխարհաքաղաքական շահերի համար Հայաստանի անկախութեան տարիները արբանեակ լինելու ժամանակաշրջան անւանելը ոչ միայն վիրաւորական, այլեւ անընդունելի է։

Մենք առանց այդ էլ շատ խնդիրներ ունենք, որոնք, եթէ իսկապէս գնահատում էք մեր երկրների երկարամեայ բարեկամութիւնը, լաւ կը լինի լուծել կոնկրետ քայլերով, ոչ թէ Հայաստանը վերածել աշխարհաքաղաքական բախման թատերաբեմի։

Իսկ մենք ամէն ինչ անելու ենք, որ Հայաստանը երբեք չդառնայ որեւէ մի երկրի, առաւել եւս Թուրքիայի կամ Ադրբեջանի արբանեակը»։