Արա Պուլուզեան. «Թշնամանքի սերմանումը թուրք-ադրբեջանական տանդեմին ծառայել է»
Վերջին օրերին արցախցիների հանդէպ ընդգծւած եւ խորը ատելութիւնը գործող իշխանութեան քարոզարշաւի ընթացքում ակնյայտ է: Ատելութիւնն ուղղւած է ոչ թէ Ադրբեջանին, այլ Արցախի ժողովրդին ու իշխանութիւններին: Ինչպէ՞ս կը բնութագրէք ՀՀ իշխանութիւնների կողմից նման խօսոյթը. «Ապառաժ»-ի հարցին պատասխանում է ՀՅԴ Արցախի ԿԿ ներկայացուցիչ Արա Պուլուզեանը:
Խստիւ դատապարտում ենք Հայաստանի Հանրապետութիւնում իշխող քաղաքական ուժի կողմից ընթացող նախընտրական քարոզարշաւի ընթացքում Արցախի եւ արցախահայութեան հանդէպ սփռւող ատելութեան ու անբարոյ խօսոյթը։
Հայ ժողովրդի տարբեր հատւածների միջեւ թշնամանքի սերմանումը այլ բան չէ, քան մեր թշնամի թուրք-ադրբեջանական տանդեմին ծառայելը։ Հայ ժողովուրդն իր հազարամեայ պատմութեան ընթացքում ունեցել է թէ՛ յաղթանակներ, թէ՛ պարտութիւններ։ Յաղթանակները ձեռք են բերւել միասնութեան, ներքին համերաշխութեան եւ ազգային միասնականութեան մթնոլորտում։
Հայոց պատմութիւնը լի է օրինակներով, երբ պատմութեան աղբարկղն են նետւել պառակտիչներն ու օտարի խամաճիկ դարձած անողնաշար անձինք։
Այս ընտրական քարոզարշաւի թէժ օրերին մի քանի ձայն մուրալու ակնկալիքով հայի ինքնութեան եւ արժէքային համակարգի դէմ սանձարձակւած խօսելաոճն ու աղիողորմ պահւածքը թուլութեան եւ անարժանապատւութեան ապացոյց են։
Երբ Բաքւի բանտերում հայ գերիներն ու պատանդներն իրենց հաղորդագրութիւններով ապացուցում են իրենց քաջութիւնն ու արժանապատւութիւնը, Երեւանի կենտրոնում եւ տաքուկ անկիւններում տեղաւորւած անձանց նման կեցւածքը պատւաբէր չէ, այլ՝ ամօթալի։ Ցաւալին այն է, որ աշխարհը ականատես է այս ժխտողականութեան եւ դասալքութեան դրսեւորումներին։
Համոզւած ենք, որ արցախեան հիմնահարցը պէտք է դառնայ Հայաստանի Հանրապետութեան արտաքին քաղաքականութեան առաջնային ուղղութիւններից մէկը։ Այն ոչ միայն հայրենիքի վերակերտման հարց է, այլեւ ինքնութեան պահպանման եւ արժանապատիւ ապրելու առանցք։
Վստահ ենք, որ հայ ժողովուրդը ճիշտ ընտրութեամբ կը կարողանայ ուղղել կքած մէջքը, որդեգրել սեւեռուն ու արժանապատիւ կեցւածք եւ յաղթահարել այս պատմական դժւարին ժամանակահատւածը։
