Վարդան Ոսկանեան. «Բաքւի վարչախումբը, որը Թուրքիա-Իսրայէլ լարւած յարաբերութիւնների համատեքստում ձգտում էր «մի ձեռքով երկու ձմերուկ բռնել», այժմ ստիպւած է ընտրութիւն կատարել»
Բաքւի բարբարոսական վարչախումբը, որը Թուրքիա-Իսրայէլ լարւած յարաբերութիւնների համատեքստում ձգտում էր «մի ձեռքով երկու ձմերուկ բռնել», այժմ ստիպւած է ընտրութիւն կատարել։ Այս մասին գրել է իրանագէտ Վարդան Ոսկանեանը։
«Հայերիս Ցեղասպանութեան՝ Իսրայէլում կառավարութեան մակարդակով ճանաչումը, որն ինքնին բարոյականութեան հետ որեւէ առնչութիւն չունի, նկատելիօրէն սահմափակել է արհեստածին Ադրբեջանի մանեւրի տիրոյթը եւ ստիպել վերջինիս որդեգրել բացայայտ թուրքամէտ դիրքորոշում՝ այն արտայայտելով, ոչ աւել, ոչ պակաս, դրա ԱԳՆ կոչեցեալի մակարդակում արւած յայտարարութեամբ։
Բայց Բաքւի բարբարոսական վարչախմբի այս մօտեցումը պայմանաւորւած չէ միայն Թուրքիայի հետ, իբր, «մէկ ազգ, երկու պետութիւն» լինելու հանգամանքով։
Իրանի դէմ ամերիակա-իսրայէլական վերջին անյաջող պատերազմը եւս ազդել է Բաքւի բարբարոսական վարչախմբի դիրքորոշման վրայ, քանի որ Իսրայէլի դաշնակիցը լինելը՝ ունենալով տարածաշրջանային իր գերակայութիւնը նաեւ հրթիռային հարւածներով հաստատող Իրանի նման հարեւան, այժմ չափազանց վտանգաւոր է դարձել։
Միեւնոյն ժամանակ Իսրայէլին թիկունքով շրջւելու գործընթացը Բաքւի բռնապետի համար նոյնպէս յղի է անկանխատեսելի հետեւանքներով, քանի որ այդ նոյն բռնապետի իշխանութեան յարաբերական կայունութիւնը խարսխւած է մի կողմից իսրայէլական, իսկ միւսից՝ թուրքական սիւների վրայ, որոնցից իւրաքանչիւրի դուրս բերումը միանշանակօրէն յանգեցնելու է այդ իշխանութեան խարխլման։
Արհեստածին Ադրբեջանը ժառանգական իշխանական կլանից սերող երկու բռնապետների իշխանութեան առանցքի շուրջ ձեւաւորւած պետականութեան խարխուլ աւանդոյթով գոյացութիւն է, որի ապագան կախւած է միայն մէկ անձի՝ Բաքւի ներկայիս բռնսպետի ճակատագրից, որն էլ այժմ կարող է յայտնւել իսրայէլական մուրճի եւ թուրքական պայտի արանքում»,-գրել է նա։
