Թուրքիան խստօրէն արձագանգել է Իսրայէլի վարչապետի գրասենեակի յայտարարութիւններին

Թուրքիան խստօրէն մերժել է Իսրայէլի վարչապետի գրասենեակի՝ Թուրքիայի նախագահ Էրդողանի հասցէին հնչեցրած յայտարարութիւնները՝ դրանք որակելով «պատմական փաստերից զուրկ եւ քաղաքական լրջութիւն չունեցող»։

Թուրքիայի նախագահի հաղորդակցութեան վարչութիւնը յայտարարել է, որ Իսրայէլի վարչապետ Բենիամին Նեթանիահուի եւ նրա մերձաւորների «ստոր քաղաքական խաղերը» նպատակ ունեն խուսափել պատերազմական եւ մարդկութեան դէմ յանցագործութիւնների համար պատասխանատւութիւնից։

Ըստ թուրքական կողմի՝ Իսրայէլի իշխանութիւնների կողմից Թուրքիան որպէս նոր սպառնալիք ներկայացնելու փորձը նոյն քաղաքականութեան մաս է։ Անկարան նաեւ զգուշացրել է, որ ներքաղաքական նպատակներով լարւածութեան սրումը լուրջ վտանգներ է ստեղծում տարածաշրջանային եւ համաշխարհային խաղաղութեան ու կայունութեան համար։

Թուրքիան ընդգծել է, որ շարունակելու է «կանգնել ճնշւածների կողքին եւ դէմ գնալ ճնշողներին»՝ անկախ դրա գնից, եւ պաշտպանել տարածաշրջանում խաղաղութիւնը, արդարութիւնն ու կայունութիւնը։

Անկարան աւելի վաղ յայտարարել էր, որ Իսրայէլի՝ Գազա ուղեւորւող «Global Sumud» նաւատորմի մասնակիցների դէմ գործողութիւնների առնչութեամբ ընթացող դատական գործի շրջանակում դիմել է Ինտերպոլ՝ Նեթանիահուի եւ եւս մէկ իսրայէլացի մեղադրեալի նկատմամբ «կարմիր ծանուցում» ստանալու պահանջով։