Իսլ. խորհրդարանում Թեհրանի եւ հիւսիսային իրանահայութեան պատգամաւոր դոկտ. Արա Շահվերդեանը չորեքշաբթի՝ օգոստոսի 26-ին, հանդիպել է ԱԳ նախարար Սէյէդ Աբբաս Արաղչիի հետ։
ԱԳ նախարարի տելեգրամեան ալիքում նշւած է, որ հանդիպման ընթացքում կողմերը քննարկել են փոխադարձ հետաքրքրութիւն ներկայացնող հարցեր։
Աղբիւրի համաձայն քննարկւել են երկրի քաղաքական ու տնտեսական կարեւորագոյն հարցերը, ինչպէս նաեւ ներկայ զգայուն պայմաններում տնտեսական դիւանագիտութեան հնարաւորութիւնների առաւելագոյն օգտագործման անհրաժեշտութիւնը։
Դոկտ. Շահվերդեանը շեշտել է ԱԳՆ տնտեսական դիւանագիտութեան փոխնախարարի եւ խորհրդարանի մասնագիտական յանձնաժողովների միջեւ համագործակցութեան ընդլայնման կարեւորութիւնը՝ յատկապէս Տնտեսական, Արդիւնաբերութեան ու հանքերի, իսկ տարանցման ոլորտում՝ Քաղաքաշինութեան եւ շինարարութեան յանձնաժողովների հետ։
Նա նաեւ ընդգծել է հիւսիսային հարեւան երկրների տնտեսական ներուժի նպատակային օգտագործման, առեւտրատնտեսական յարաբերութիւնների զարգացման եւ տարածաշրջանային երկրների հետ փոխանակումների ծաւալի մեծացման անհրաժեշտութիւնը։
Հանդիպմանն ընդգծւել է նաեւ ԱԳՆ-խորհրդարան շարունակական խորհրդակցութիւնների եւ համակարգման կարեւորութիւնը՝ տնտեսական դիւանագիտութեան ամրապնդման եւ տարածաշրջանային համագործակցութեան զարգացման նպատակով։
