Սուրէն Սուրէնեանց. «Տիգրանաշէնի հարցը կարող է վերածւել միակողմանի զիջման»
«Դեմոկրատական այլընտրանք» կուսակցութեան նախագահ Սուրէն Սուրէնեանցը, անդրադառնալով Նիկոլ Փաշինեանի՝ անկլաւների վերաբերեալ վերջին յայտարարութեանը, մտահոգիչ է համարել Տիգրանաշէնի եւ Տաւուշի անկլաւների հարցի օրակարգ վերադարձը։
Նրա խօսքով՝ եթէ Հայաստանը հրաժարւի իր վերահսկողութեան տակ գտնւող տարածքներից, ապա դա պէտք է տեղի ունենայ Արծւաշէնի վերադարձին զուգահեռ՝ յստակ փոխադարձ պարտաւորութիւններով եւ երաշխիքներով։
Սուրէնեանցը յատկապէս ընդգծել է Տիգրանաշէնի ռազմավարական նշանակութիւնը՝ այն համարելով Հայաստան-Իրան կարեւորագոյն ճանապարհային ուղղութիւններից մէկը։
«Եթէ Հայաստանը յանձնում է իր վերահսկողութեան տակ գտնւող տարածքները, մինչդեռ Ադրբեջանի վերահսկողութեան տակ գտնւող հայկական տարածքների վերադարձը չի իրականացւում նոյն պահին, ապա նման գործընթացը դժւար է անւանել հաւասարակշռւած սահմանազատում»,- նշել է նա։
Սուրէնեանցի համոզմամբ՝ սահմանազատումը կարող է խաղաղութեան գործիք դառնալ միայն փոխադարձութեան, գործողութիւնների միաժամանակեայ իրականացման եւ անվտանգութեան յստակ երաշխիքների պայմաններում։
