Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի շնորհաւորական ուղերձը Անկախութեան տօնի առիթով
(21 սեպտեմբերի, 2026 թ.)
Մայր Աթոռ Սուրբ Էջմիածնից Հայրապետական Մեր օրհնութիւնն ենք բերում մեր ժողովրդին ի Հայրենիս եւ ի Սփիւռս եւ շնորհաւորում Անկախութեան տօնի առիթով։
Այսօր տօնախմբում ենք Հայոց անկախ պետականութեան վերահաստատման 35-րդ տարեդարձը։ Այս տարիների ընթացքում մեր հայրենիքն անցել է բազում փորձութիւնների միջով, սակայն մեր ժողովուրդը երբեք չի ընկճւել, չի յուսահատւել, մեծ զոհողութիւնների գնով անգամ շարունակել է հայրենաշինութեան սրբազան առաքելութիւնը եւ իր ներուժը ծառայեցրել ազգային զարթօնքին։
Անկախութեան տօնն այսօր հրաւէր է մեզ վերարժեւորելու անցած ուղին եւ մեր կեանքի ընթացքը։ Ներկայիս բարդ պայմաններում, առաւել քան երբեւէ, անհրաժեշտ է լինել միասնական եւ մնալ համախմբւած հայրենիքի շուրջ, որպէսզի կարողանանք դիմագրաւել ներքին ու արտաքին սպառնալիքներին։ Անկախութեան տօնական օրւայ խորհրդով զօրացած՝ անմնացորդ նւիրումով շենացնենք ու պայծառացնենք մեր երկիրը եւ ամենայն նախանձախնդրութեամբ ու պատասխանատւութեամբ պաշտպանենք մեր ժողովրդի ազատ ու անվտանգ կեանքի իրաւունքը այս սրբազան հողի վրայ։ Ամուր պահենք Քրիստոսաւանդ յոյսը, հաւատն ու սէրը, հաւատարիմ մնանք ազգային-հոգեւոր մեր արժէքներին եւ միասնաբար կերտենք արդար, օրինայարգ, համերաշխ հասարակութիւն՝ յանուն մեր ապահով ու լուսաւոր ապագայի։
Աղօթք ենք բարձրացնում առ Աստւած, որ խաղաղութեան մէջ պահի հայրենի մեր երկիրը, Իր Սուրբ Հոգու իմաստութեամբ առաջնորդի մեր ժողովրդին եւ պարգեւի բարօր ու առաջընթաց կեանք. ամէն։
