Աւետիք Իշխանեանը՝ «ԱԼԻՔ»-ի հետ զրոյցում. «Սին յոյսեր են. թէ հանրաքւէով կը մերժւի նոր Սահմանադրութիւնը»

Նիկոլ Փաշինեանի, նոր Սահմանադրութեան գաղափարը երկու նպատակ է հետապնդում։ Առաջինը՝ նրա յեղափոխափանջունիական մոլուցքն է, ամէն ինչ մոռանալ եւ պատմութիւնը սկսել 2018 թւականից: Այստեղ մենք գործ ունենք նաեւ նրա անվերջ ինքնահաստատման բարդոյթի հետ, այդ մասին են վկայում բազմաթիւ փաստեր՝ նրա արձանի տեղադրումը, «քաղաքացու օր» տօն հռչակելը, նրա «իմաստուն» խօսքերով Հանրապետութիւնը ողողելը, «վարչապետի գաւաթ» մարզական խաղերի անցկացումը, վաստակաւոր եւ ժողովրդական կոչումների փոխարինումը «Մեր ժամանակի հերոսը» մրցանակաբաշխութեամբ, տարբեր տատիկ-պապիկների հետ «պատահական» հանդիպում-բեմադրութիւնները։ Այս մասին «ԱԼԻՔ»-ի հետ զրոյցում յայտնեց իրաւապաշտպան Աւետիք Իշխանեանը՝ անդրադառնալով, նոր Սահմանադրութեան ընդունման ՀՀ կառավարութեան առաջ քաշած ծրագրի նպատակներին:

Երկրորդ նպատակը, ըստ Աւետիք Իշխանեանի՝ բաւարարելն է թուրք-ադրբեջանական պահանջների՝ ուրանալով Արցախը, Հայոց Ցեղասպանութիւնը եւ մեր հազարամեակների խորհրդանիշ Արարատ լեռը։

Անդրադառնալով խնդրին, որ տարբեր ոլորտի աղբիւրներ ասում են, թէ խաղաղութեան պայմանագրի նախագծում Ալիեւն է պահանջ ամրագրել Հայաստանի ներքին օրէնսդրութիւնը համապատասխանեցնել այնպէս, որ պայմանաւորւող կողմերը միմեանց նկատմամբ տարածքային պահանջներ չունենան, ապա, նոր Սահմանադրութիւնը, իրօք կարո՞ղ է նման սպառնալիքի վերածւել, ՀՀ տարածքային ամբողջականութեան համար, Իշխանեանը չբացառեց, որ Ադրբեջանի նախագահը նման պահանջներ ներկայացրած լինի:

«Բայց, արդեօք, ինքը՝ Ադրբեջանի նախագահը պաշտօնապէս չի յաւակնո՞ւմ ողջ Հայաստանի տարածքին, այն անւանելով Արեւմտեան Ադրբեջան»,-նկատեց Իշխանեանը՝ յաւելելով, որ այդ սպառնալիքներին, պաշտօնական Երեւանից ոչ մի պատասխան չի հնչում:

Աւետիք Իշխանեանը, նշեց, որ հարց է ծագում՝ ինչո՞ւ…: «Իսկ գուցէ, ինչ-ինչ պայմանաւորւածութիւններ կան, որ մենք չգիտենք եւ պատասխանի դէպքում, ադրբեջանական կողմն այն կարող է բացայայտել»,- կարծում է նա:

Ինչ վերաբերում է Հայաստանի տարածքային ամբողջականութեան սպառնալիքին, ապա իրաւապաշտպանը կարեւորեց, որ ներկայ վարչախմբի ամէն օրը, ժամը, սպառնալիք են ընդհանրապէս Հայաստանի գոյութեանը։

Ինչ գործընթացներ է նախատեսում նոր սահմանադրութեան վաւերացումը, ինչպիսի ապագայ կարելի է ենթադրել դրա համար, Իշխանեանը պարզաբանեց, որ նոր սահմանադրութիւնը պէտք է ընդունւի հանրաքւէով եւ մինչ հանրաքւէն, Սահմանադրութեան նախագիծը կը ներկայացւի, այսպէս ասած, հանրային քննարկման, ապա Ազգային ժողովի օրակարգ կը մտնի, ԱԺ-ում ընդդիմադիր պատգամաւորները թունդ ելոյթներ կունենան, բայց «որակեալ» մեծամասնութիւն ունեցող ՔՊ-ն կը հաստատի սահմանադրութեան նախագիծը եւ այն կը դրւի հանրաքւէի։

Անդրադառնալով պատմութեան տարբեր էտապներում ՀՀ Սահմանադրութեան փոփոխութեան դրւագներին, Աւետիք Իշխանեանը յիշեցրեց, որ Հայաստանում առաջին Սահմանադրութիւնն ընդունւեց 1995 թւականին, ապա երկու անգամ, 2005 եւ 2015 թւականներին այն ենթարկւեց փոփոխութիւնների։

«Որպէս ականատես, վստահաբար եմ պնդում, որ երեք անգամ էլ հանրաքւէները կեղծւել են եւ, ընդհանրապէս, Հայաստանում ընտրութիւնների միջոցով իշխանափոխութիւն չի եղել, ընտրութիւնները եւ հանրաքւէները կեղծւել են։ Այնպէս որ, սին յոյսեր են, թէ հանրաքւէով կը մերժւի նոր սահմանադրութիւնը եւ ինչպէս 2021 թւականի ընտրութիւններում, գործի կը դրւեն ողջ վարչական ռեսուրսը, տարաբնոյթ կեղծիքները եւ յաջորդ օրը կենտրոնական ընտրական յանձնաժողովը կը հաստատի նոր սահմանադրութեան ընդունումը, օրինակ 60% ձայներով»,- նշեց նա:

Իշխանեանը հռետորական հարց ուղղեց, յուսալով, որ գոնէ այս անգամ կը միաւորւի՞ տարբեր ձեւաչափերով հանդէս եկող ընդդիմութիւնը՝ վճռական դիմադրութեամբ, կանխելու հերթական աղէտը, իրականացնելով իշխանափոխութիւն։

Իրաւապաշտպանը շեշտեց, որ նոր սահմանադրութեամբ, փորձ է կատարւում, որ հայ ժողովուրդը մոռանայ իր անցեալը, պատմութիւնը, աւանդոյթներն ու խորհրդանիշերը, վերածւելով յիշողութիւնից եւ ազգային արժէքներից զուրկ զանգւածի։ Նման զանգւածին շատ հեշտ է կառավարել:

«Կը յաջողւի՞, արդեօք, կարծում եմ՝ ոչ»,- ամփոփեց նա: