Փաշինեանը Զինւած ուժերից պահանջում է խախտել օրէնքը, Ալիեւին տալիս լեգիտիմ իրաւունք մեղադրանքներ առաջադրելու
Փաշինեանի վտանգաւոր թէզերը
Նիկոլ Փաշինեանը Հայաստանի հանրային ռադիոյի «Անվտանգային միջավայր» հաղորդման շրջանակում տւած հարցազրոյցում բանակին ու անվտանգային հարցերին առնչւող բազմաթիւ անտրամաբանական ու անհեթեթ մտքեր ու ձեւակերպումներ է թոյլ տւել, կար նաեւ վտանգաւոր բառակոյտ:
Նիկոլ Փաշինեանի յայտարարութիւններն ու շարադրանքը մեկնաբանելը վաղուց դարձել է անշնորհակալ գործ, ամէն դէպքում, որոշ մտքեր կէտ առ կէտ կառանձնացնենք, որոնք, թերեւս, առաջին անգամ էին հնչում:
Առաջին, Փաշինեանն ասում է, որ բանակի կառուցման կոնտեքստում շատ կարեւոր է ունենալ լեգիտիմ նպատակներ: Այլ կերպ, ըստ փաշինեանական տրամաբանութեան, այսուհետ բանակը պիտի իր առջեւ լեգիտիմ խնդիրներ դնի, այսինքն՝ մինչ այս ոչ լեգիտիմ խնդիրներ է լուծել:
«Տեսէք, նախ մենք ընդգծում ենք, եւ իւրաքանչիւր երկրի լեգիտիմ իրաւունքն է ունենալ ուժեղ եւ մարտունակ բանակ: Բայց այս հարցը հետագայ քննարկման անհրաժեշտութիւն եւ կարիք ունի, որովհետեւ եթէ դու ուժեղ եւ մարտունակ բանակ ունես լեգիտիմ նպատակներ իրագործելու համար, ոչ մէկը քեզ չի կարող ասել՝ ինչո՞ւ ես դու քո բանակն ուժեղացնում: Եթէ դու խնդիր ես դնում նպատակ, որի լեգիտիմութիւնն արտաքին միջավայրի եւ միջազգայնօրէն կարող է դրւել կասկածի տակ, այստեղ առաջանում են բազմաթիւ խնդիրներ:
