Արցախի ԱԺ. «ԼՂ խնդիրը լուծւած չէ, Արցախի հայաթափումը բռնազաւթումը չի կարող վերացնել ինքնորոշման անքակտելի իրաւունքը»
Արցախի Ազգային ժողովի ղեկավար կազմը հանդիպել է Արցախի հարցերով յանձնախմբի համակարգողի հետ։ Այս մասին տեղեկացնում են Արցախի ԱԺ-ից:
«Այսօր՝ փետրւարի 19-ին, Արցախի Հանրապետութեան Ազգային ժողովի նախագահի տեղակալ, նախագահի պարտականութիւնները կատարող Գագիկ Բաղունցը եւ խմբակցութիւնների ղեկավարները հանդիպել են Արցախի ժողովրդի հաւաքական հայրենադարձութեան եւ հիմնարար այլ իրաւունքների պաշտպանութեան նպատակին կոչւած յանձնախմբի համակարգող Վարդան Օսկանեանի հետ:
Հանդիպման մասնակիցները շեշտել են, որ Լեռնային Ղարաբաղի հիմնախնդիրը լուծւած չէ, որ Արցախի հայաթափումը եւ ժամանակաւոր բռնազաւթումը չի կարող վերացնել Արցախի ժողովրդի ինքնորոշման անքակտելի իրաւունքը, սեփական հազարամեայ բնօրրանում անվտանգ եւ ապահով ապրելու բնական պահանջը, որն ամրագրւած է միջազգային իրաւունքի նորմերով:
Քննարկւել են այն քայլերը, որոնք անհրաժեշտ են միջազգային հիմնաւոր երաշխիքների ներքոյ ստեղծելու անվտանգ ու իրաւական դրոյթներով ամրագրւած միջավայր՝ արցախահայութեան հայրենադարձման եւ անվտանգ ու ապահով կենսագործունէութեան իրականացման համար՝ բացառելով ֆիզիկական գոյութեան ու ինքնութեան սպառնալիքները: Կարեւորւել է այդ ուղղութեամբ համահայկական կառոյցների եւ անհատների ջանքերի նպատակաուղղւած եւ թիրախային համադրումը։
Անթոյլատրելի է համարւել արցախահայութեան հայրենադարձման հարցի շահարկման եւ չարաշահման որեւէ դրսեւորում»,- ասւած է հրապարակւած հաղորդագրութեան մէջ:
