Վազգէն Սարգսեանի յոբելեանին շարունակւում է նրա զաւակի՝ Հայոց ազգային բանակի հեղինակազրկումը

Վազգէն Սարգսեանի յոբելեանին շարունակւում է նրա զաւակի՝ Հայոց ազգային բանակի հեղինակազրկումը եւ ոգեզրկումը Հայաստանի ռազմաքաղաքական ղեկավարութեան կողմից.

• Ռազմական զօրավարժութիւնների փոխարէն՝ «թիթեռ նկարելու» մարզական տարատեսական բեմականացումներ, երբ ժամերով ՀՀ ԶՈՒ եւ ՊՆ ղեկավարները վայելում են այդ հերթապահ միջոցառումները:
• Ատեստացիայի անւան տակ բարձրագոյն զինւորականներին դարձրել են աշխատավարձ բարձրացնելու գլխաւոր դերակատարներ եւ հրապարակային գործող անձինք:

Շարքը կարելի է շարունակել, բայց վերջին ու ակնառու խայտառակութեանը Պաշտպանութեան նախարարութիւնն անգամ արդարացում չի կարողանում գտնել:

Արդէն տեւական ժամանակ է, որ խօսւում է, անգամ փաստեր են ներկայացւում, որ զօրամասերից հեռացւում են Փառքի անկիւնները, հանւում են մեր նահատակ հերոսների լուսանկարները: ՊՆ պարզբանումն էլ խիստ էսթետիկ էր՝ լուսանկարները մաշւել են, Փառքի անկիւններում արդիականացման աշխատանքներ են տարւում:

Դեռ փետրւարի 12-ին հարցում էի ուղարկել ՊՆ՝ ճշտելու, թէ գրաւոր ի՞նչ յանձնարարական կայ Փառքի անկիւնների թարմացման վերաբերեալ, ի՞նչ ժամկէտներում է նախատեսւած իրականացնել արդիականացումը:

Ինչպէս յաճախ է լինում, նախարարութիւնը, օրէնքի պահնաջների խախտմամբ, չի կարողանում յօդաբաշխ բացատրութիւն տալ նաեւ այս հարցին:

Ի դէպ, արդէն երկու տարի, հակառակ իմ կողմից բազմիցս բարձրաձայնումների, չեն կարողանում բացատրել նաեւ, թէ ինչպէս կամ ինչու ՊՆ կայքից անհետացաւ Արցախեան ազատամարտ բաժինը:

Եւ այսպէս Զինւած ուժերում հետեւողական ուրանում են անցեալը, մեր յաղթանակները, նահատակներին, Վազգէն Սարգեանին. սպարապետի յիշատակն էլ դարձրին լոկ մարզախաղ: Ուրացումը շարունակւում է:

Մարտի 4-ին արդէն յայտնի դարձաւ, որ թշնամաբար «Քանաքեռ-Զէյթուն» ԲԿ պատից հեռացրել են հերոս Ալբերտ Յովհաննիսեանին նւիրւած յուշատախտակը:

ԳԵՂԱՄ ՄԱՆՈՒԿԵԱՆ
ՀՅԴ Հայաստանի ԳՄ անդամ, «Հայաստան» խմբակցութեան պատգամաւոր

Arfd.am