«Թոյլ մի տւէք թշնամին մտածի ձեր փոխարէն․․․». Բագրատ Սրբազան
Ոչ մի ուժ չի´ կարող մեզ ընկճել, ճզմել, եթէ մեր հաւատքը խարսխւած է մեր Տիրոջ յարութեան յաղթանակի վրայ, զատկական քարոզի ժամանակ այս մասին ասել է Տաւուշի թեմի առաջնորդ Տէր Բագրատ արքեպիսկոպոս Գալստանեանը։
«Յարութեան աւետիսով՝ մեր հայացքը ուղղելով դէպի մեր նահատակ զաւակները, իրենց ընտանիքները, ուխտ կնքենք երկնքի եւ երկրի առջեւ վերստին մեր կեանքը դարձնել յարութեան եւ յաղթանակի կեանք: Յարութեան յաղթանակի աւետիսը մեր որբացած Արցախ աշխարհին: Մենք կամ կը նոյնանանք յարութեան յաղթանակի հետ կամ գերեզմանի»,- նշել է նա:
«Ի՞նչ պատգամ ունեմ ես, որ ապրում եմ յարութեան յաղթանակի խորհրդի մէջ․․․ Սաղմոսի բառերն են վազում մտքիս առջեւով՝ թէպետ ընթանամ մահւան հովիտներով, չեմ վախենայ չարից, որովհետեւ Տէր, Դու ինձ հետ ես․․․ Սա հաստատակամ համոզում է եւ այդպիսին պիտի դառնայ մեզ համար, ժողովուրդ, եթէ իսկապէս մենք ուզում ենք մաքրւած, վերափոխւած ազգ դառնալ, ո՛չ թափառական՝ թէ՛ մտքով, թէ՛ հոգով, թէ՛ ֆիզիկապէս, ո՛չ սովորական, ո՛չ փողոցայնացած, ո՛չ վարքազրկւած, ո՛չ արժեզրկւած, ո՛չ գաղափարազրկւած, ո՛չ հայրենազրկւած եւ ո՛չ էլ Աստւածազրկւած»,- ասել է Սրբազանը:
Նա ընդգծել է` բարդ, դժւար ու վճռորոշ ժամանակներ են, եւ հէնց մեր սերունդին է պատիւը տրւել այդ վճռորոշ, բարդ ու դժւար ժամանակները, մեր պարտութեան ժամանակները դարձնել ոչ թէ յանձնւելու, ստորանալու, նւաստանալու ժամանակներ, այլ հակառակը՝ դարձնելու մեզ համար վերելքի, սխրանքի, հերոսութեան, յաղթանակների եւ յարութեան ժամանակներ:
«Ոչ մի ուժ չի´ կարող մեզ ընկճել, ճզմել, եթէ մեր հաւատքը խարսխւած է մեր Տիրոջ յարութեան յաղթանակի վրայ: Ես հաւատում եմ․ ինչպէս քչով` ընդամէնը 12 առաքեալներով նւաճեցին ամբողջ աշխարհը, մենք էլ մի բռով ու բռունցքով կը կարողանանք ոչ միայն յաղթահարել, այլ մեզ վրայ եկող բոլոր հարւածները դարձնել կեանքի ճանապարհ:
Մտքի եւ հոգու հարձակում․․․ Չի´ ստացւելու, սատանայ, չի՛ ստացւելու, չարիք, չի՛ ստացւելու, մի՛ փորձիր։ Որքան էլ քո մահւան ստւերներն ու հովիտները լոյսի տեսքով ներկայանան մեզ, չե՛ն կարողանալու յաղթել մեզ, որովհետեւ մեր Տէր Աստւածն է մեզ հետ․․․ Նայէ´ք ձեր զաւակների աչքերի մէջ․․․ այս երեխաներին ու իրենց յետոյ եկողներին մենք պատասխան պիտի տանք․․․ որոշումներ կայացնելու ժամանակն է․․․ Մեր կեանքի լուծումը մեր ձեռքերի մէջ է, միայն թէ ճշմարտութիւնն ու արդարութիւնը դառնայ մեր կեանքի սկզբունք: Դեռ սպառնում են մեզ: Մեր կեանքի վճռական ժամանակն է եւ մենք ասելիք ունենք այդ ժամանակի մէջ, եւ անելիք ունենք այդ ժամանակի մէջ․․․
Ժողովուրդ, ժամ տւէք ձեզ, մտածէ՛ք: Թոյլ մի տւէք թշնամին մտածի ձեր փոխարէն․․․
Այս օրը մեզ համար պիտի դառնայ յաղթանակ կնքելու ուխտի օր»,- ասել է Բագրատ Սրբազանը:
