Կանադահայութիւնը կը միանայ «Տաւուշը յանուն Հայրենիքի» շարժման

Կազմակերպութեամբ ՀՅԴ ԳԵՄ-ի Տորոնտոյի «Ս. Զաւարեան» մասնաճիւղին, կիրակի, մայիսի 5-ին, ժամը 14:00-ին, Տորոնտոյի Հայ կենտրոնին դիմաց տեղի ունեցաւ «Տաւուշը յանուն Հայրենիքի» զօրակցական ժողովրդային հաւաք, ներկայութեամբ Կանադայի հայոց թեմի առաջնորդ Տ. Բաբգէն արք. Չարեանի, Տորոնտոյի Ս. Աստւածածաին եկեղեցւոյ հոգեւոր հովիւներ՝ Տ. Տաթեւ աւ. քհնյ. Միքայէլեանի եւ Տ. Վարդան վրդ. Թաշճեանի, ՀՅԴ Կենտրոնական կոմիտէի ներկայացուցիչ Խորէն Տիմիթեանի, ԳԵՄ-ի ու Պատանեկան միութեան անդամներուն եւ սրտցաւ հայրենակիցներու:

ԳԵՄ-ի անունով խօսք առաւ Մինաս Վերտանեան եւ ըսաւ. «Հայորդինե՛ր, պահը օրհասական է. պայքարը՝ մէկ, եւ թշնամին՝ մէկ, երէկ Արցախն ու Շուշին, այսօր Տաւուշը, վաղը Սիւնիքը, աւելի ուշ Երեւանը գրաւելու լուրջ վտանգին դէմ յանդիման կանգնած ենք: Պահն է համախմբուելու ու քայլելու Չարենցի հետքերով, որ կըսէ «Ով հայ ժողովուրդ, քո միակ փրկութիւնը քո հաւաքական ուժին մէջն է»: Առաջնորդւինք Նժդեհի, Արամ Մանուկեանի, Պետոյի, Դուշմանի կտակով: Մենք խաղաղութեան կողմնակից ենք, բայց արժանապատիւ ու կայուն խաղաղութեան. ոչ մէկ ժամանակ միակողմանի զիջումները խաղաղութիւն կապահովեն, ոչ մէկ ժամանակ յանձնւողական քաղաքականութիւնը կը զսպէ թշնամիին յարձակողապաշտ ախորժակները», ապա եզրափակեց. «Մենք՝ ուխտեալ եւ երդւեալ պատանիներ ու երիտասարդներ, պիտի շարունակենք քայլել մեր նախնիներուն ուղիով. թող հնչեն զանգերը, որպէսզի հայ մարդը երբեք չլքէ իր տունը, որպէսզի Եռաբլուրը անտէր չմնայ ու Ծիծեռնակաբերդ չդառնայ. մենք կը հաւատանք, որ հոգեւոր Հայաստանը պիտի յաղթէ «Նոր Հայաստան»-ին, սէրն ու հաշտութիւնը պիտի յաղթեն ատելութեան եւ թշնամանքին, եւ Եռագոյնը պիտի յաղթէ սեւին ու սպիտակին»:

Անկէ ետք ՀՅԴ Կենտրոնական կոմիտէի ներկայացուցիչ Խորէն Տիմիթեան ելոյթ ունեցաւ ըսելով. «Այսօր հայրենիքի մէջ մեր հայրենակիցները փողոցներն են՝ դատապարտելու հայրենի հողեր յանձնելու Հայաստանի իշխանութեան դաւադիր ընթացքը: Եւ ՀՅԴ Կանադայի կառոյցը խստօրէն կը դատապարտէ Հայաստանի իշխանութեան յանձնւողական վարքագիծը: Մենք Արցախի, Տաւուշի եւ համայն հայութեան կողքին ենք, կրկին անգամ կը դատապարտենք հայրենի հողերը յանձնելու եւ զիջելու իշխանութիւններուն պարտւողական դաւադիր այս ընթացքը եւ կու գանք հաստատելու, որ որպէս ժառանգորդներ մեր պատմական հայրենիքին, այսօրւան եւ վաղւան յաջորդական սերունդներով, վճռած ենք անվհատ շարունակել մեր պայքարը մինչեւ մեր արդար իրաւունքներու վերատիրացումը»:

Կանադայի հայոց թեմի առաջնորդ Տ. Բաբգէն Արք. Չարեան փոխանցեց իր պատգամը ըսելով. «Այս օրերուն ոչ մէկ հայ կրնայ անտարբեր մնալ, երբ Տաւուշէն սկիզբ առած է քայլարշաւ մը, ոչ միայն քալելու, այլ խօսքը լսելի դարձնելու, այսօրւան իշխանութիւններուն, որոնք զիջումի քաղաքականութիւն կը վարեն. երէկ Արցախն էր, այսօր Տաւուշը, վաղը Գեղարքունիքը, միւս օրը Սիւնիքը եւ Երեւանը… անընդունելի է նման մօտեցում ու քաղաքականութիւն: Որքան որ հայ եկեղեցին սրբութիւն է, նոյնքան հայրենի հողը սուրբ է եւ անժամանցելի գանձ», ապա խօսքը ուղղելով ԳԵՄ-ականներուն ըսաւ. «Ուրախ ենք, որ մեր ԳԵՄ-ականները այսօր այստեղ, եկեղեցւոյ դիմաց մեր ժողվուրդին հետ կու գայ միանալու այն շարժման, որ ճշմարտութեան կողքին է, կու գայ ըսելու, որ մենք տէրն ենք մեր հողին, մենք արժանապատւօրէն պահելու ենք մեր սուրբ հողը»:

Սրբազան Հայրը իր պատգամը փակեց ըսելով. «Մեր ժողովուրդը պատմութեան ընթացքին նման տագնապներէ անցած է, բայց երբեք չէ յուսահատած: Մենք երբեք իրաւունք չունինք յուսահատելու. մենք պիտի շարունակենք մեր պայքարը՝ յանուն վաղւան արդարութեան, յանուն ճշմարտութեան, յանուն մեր հողերու ձեռքբերման ու պահպանման, մեր արժէքներու ու սրբութիւններու պահպանման ու յանուն մեր ապագայի տեսիլքի իրականացման»:

Հաւաքը վերջ գտաւ «Սարդարապատ» յաղթերգի խմբային երգեցողութեամբ:

Սոնա Թիթիզեան Կէտիկեան

«Հորիզոն»