Հայաստանի Հանրապետութիւնը վերակերտելու ենք միասնականութեամբ․ այց Արամ Մանուկեանի յուշարձանին

«ԱԼԻՔ» – ՀՅԴ Բիւրոյի եւ ՀՅԴ Հայաստանի Գերագոյն մարմինները, կառոյցի հայաստանեան ու Սփիւռքի ներկայացուցիչները, ՀՅԴ Հայաստանի Երիտասարդական միութեան ու ՀՅԴ «Նիկոլ Աղբալեան» Ուսանողական միութեան անդամներն ու քաղաքացիներ Հայաստանի Առաջին Հանրապետութեան հիմնադրման 106-ամեակի առիթով այցելել են Արամ Մանուկեանի յուշարձանին ու ծաղիկներ խոնարհել։ Հաղորդում է Yerkir.am-ը:

Ելոյթով հանդէս է եկել ՀՅԴ անդամ, ՀՀ ԱԺ «Հայաստան» խմբակցութեան քարտուղար Արծւիկ Մինասեանը։

«Այսօր եկել է մեր պայքարը վերահաստատելու օրը։ Եւ մենք վերահաստատում ենք մեր պայքարը, վերահաստատում ենք Առաջին Հանրապետութեան հիմնադիր հայրերի նպատակները։ Մեզանից պահանջւում է համախմբութիւն՝ համահայկական համախմբութիւն, ուժականութիւն, որ վերահաստատենք ու ասենք, որ Հայաստանի առաջին Հանրապետութիւնը պատահականութիւն չէր, Հայաստանի ու Արցախի անկախութիւնը պատահականութիւն չէր եւ մենք վերակերտելու ենք մեր միացեալ երկրի, մեր միացեալ Հայաստանի անկախութիւնը»:

Նա ընդգծել է, որ Հայաստանի եւ Արցախի Հանրապետութիւնները պատահականութեան արդիւնքում չեն ստեղծւել, այլեւ՝ պայքարի արդիւնքում։

«Անկախութեան ձեռքբերումը հրաշալի է, բայց շատ կարեւոր է անկախութիւնը պահելը, փայփայելը եւ ամենակարեւորը՝ զգօն լինելը։ Մենք զգօն չեղանք, չտեսանք մեր միջից աճող որդը՝ թշնամական որդը, դաւաճաններին, հակառակը՝ մենք նրանց փայփայեցինք, սիրաշահեցինք, առանց ըմբռնելու, առանց ընկալալելու, որ սրանք գալիս են, որ մեր դարաւոր երազանքը կոտորեն, փշրեն, թշնամուն յանձնեն Հայաստանի Հանրապետութիւնը»,- ասել է Մինասեանը:

ՀՅԴ անդամ, իրանագէտ, պ․գ․թ․ Սարգիս Մկրտչեանի համոզմամբ՝ այն ժամանակ եւ հիմա էլ կայ այն գաղափարը մի խմբի մօտ, որ մենք անկարող ենք ու պարտաւոր ենք ծնկել թուրքերի առջեւ, բայց կայ նաեւ մի խումբ, որ այդպէս չի մտածում ու պայքարում է՝ հաւատալով, որ մենք արժանի ենք եւ իրաւունք ունենք անկախ ապրել այս երկրագնդի վրայ։

ՀՅԴ Հայաստանի ԳՄ անդամ, բժիշկ, ազատամարտիկ Տարօն Տօնոյեանը Yerkir.am-ի հետ զրոյցում կարեւորել է Արամ Մանուկեանի դերը պայքարի ու պետականակերտման գործում՝ նշելով, որ այն ինչ այսօրւայ իշխանականներն են անում լրիւ հակառակն է։ ՀՅԴ Բիւրոյի անդամ, Ֆրանսիայի հայկական կազմակերպութիւնների համակարգող խորհրդի համանախագահ Մուրադ Փափազեանն էլ կիսւել է իր զգացողութիւններով, քանի որ Փաշինեանի որոշմամբ՝ երկու տարուց աւելի զրկւած էր հայրենիքում լինելու հնարաւորութիւնից, իսկ այս խորհրդանշական օրով յուզիչ էր իր համար հայրենիքում գտնւելը։