Վարդան Պօղոսեան. «Այսօր, ցաւօք սրտի, պետականութեան հիմնասիւները վտանգւած են»
«ԱԼԻՔ» – «Մենք ունենք Սահմանադրութեան օր, բայց չունենք սահմանադրականութիւն, չունենք այնպիսի իրավիճակ, որը սահմանւած է Հայաստանի Հանրապետութեան Սահմանադրութեամբ։ Եւ այսօրւայ Սրբազան Պայքարը նաեւ Հայաստանի Հանրապետութեան Սահմանադրութեան համար է»: Այս մասին երէկ՝ յուլիսի 6-ին, Երեւանի Սուրբ Աննա եկեղեցու բակում ընթացող հաւաքի ժամանակ ասել է սահմանադրագէտ Վարդան Պօղոսեանը։
Պօղոսեանի խօսքով՝ Հայաստանի մայր օրէնքն իսկապէս ազգային է, այն անկախ Հայաստանի պետականութեան հիմքերն է դրել։
«Բայց այսօր, ցաւօք սրտի, այդ պետականութեան հիմնասիւները վտանգւած են, որովհետեւ այսօրւայ իշխանութիւնը, ընդհանրապէս չարժեւորելով որեւէ ազգային արժէք, հարցականի տակ է դնում նաեւ ՀՀ Սահմանադրութիւնը՝ նրա գոյութիւնն այսօրւայ տեսքով։ Վարչախմբի ղեկավարն այսօր նորից յայտարարել է, թէ ՀՀ-ին անհրաժեշտ է նոր սահմանադրութիւն՝ կոծկելով այն հանգամանքը, որ իրեն դրդում են սահմանադրութիւնը փոխել»,- ասել է սահմանադրագէտը՝ նշելով, որ օրւայ իշխող ռեժիմը հարցականի տակ է դնում այն ամէնն, ինչ ազգային է սահմանադրութիւնում:
«Դրա վառ օրինակը իշխանութիւնների ցանկութիւնն է՝ հանել Սահմանադրութեան նախաբանում ՀՀ Անկախութեան մասին հռչակագրի վկայակոչումը։ Այս յունւարից, երբ Փաշինեանն ասաց, թէ ՀՀ-ին անհրաժեշտ է նոր սահմանադրութիւն, որեւէ իմաստալից հիմնաւորում դրա համար չբերւեց։ Բայց շատ արագ պարզ դարձաւ, որ խօսքը այն մասին է, որ ՀՀ սահմանադրութիւնից ուզում են հանել նախաբանում հաաստատագրւած ՀՀ Անկախութեան մասին հռչակագրի վկայակոչումը, այսինքն՝ հիմնասիւնը, որի վրայ յենւած է մեր այսօրւայ Երրորդ Հանրապետութիւնը»,- ասել է նա՝ յաւելելով. «Այսօր Հայաստանի իշխանութիւնն անբարոյ կռիւ է սկսել Արարատ լեռան դէմ։ Այսօր Փաշինեանի վարչակազմը, ընկրկելով թուրքական ու ադրբեջանական ճնշման դէմ, վախենում է նոյնիսկ Արարատ լեռան մասին խօսել, Արարատը փորձում է փոխարինել Արագածով, վաղը Արագածին կասեն՝ Ալագեազ եւ այդպէս շարունակ»։
Վարդան Պօղոսեանի խօսքով` խորհրդանիշները կարեւոր են հայ ժողովրդի ինքնութեան համար, պատմական յիշողութեան համար.
«Եթէ ժողովուրդները չունեն պատմական յիշողութիւն, վերանալու են պատմութեան թատերաբեմից, այս վարչախումբը մեզ տանում է այդ ճանապարհով: Արշաւը, որ սկսւել է եկեղեցու դէմ, արշաւ է նաեւ մեր ազգային ինքնութեան դէմ»,- ասել է նա:
