Գարեգին Բ. «Այսօր նոր փորձութիւնների միջով է անցնում մեր երկիրն ու ժողովուրդը, վերստին կանգնած ենք անվտանգային հիմնախնդիրների առջեւ»
«ԱԼԻՔ» – Ն.Ս.Օ.Տ.Տ. Գարեգին Բ Ամենայն Հայոց կաթողիկոսը շնորհաւորական ուղերձ է յղել Սեպտեմբերի 21-ի՝ Հայաստանի Հանրապետութեան Անկախութեան տօնի առիթով: Այս մասին տեղեկացնում է մայր աթոռի մամլոյ ծառայութիւնը:
«Անկախութեան նւիրական տօնի առիթով Մայր Աթոռ Սուրբ Էջմիածնից Հայրապետական Մեր օրհնութիւնն ու բարեմաղթանքներն ենք բերում համայն մեր ժողովրդին: Առաւել քան երեք տասնամեակ առաջ մեր ժողովուրդը վերահաստատեց իր անկախ պետականութիւնը` նախնեաց աւանդած սուրբ արժէքներով ապրելու, հայրենիքի լուսաւոր գալիքը կառուցելու տեսլականով եւ յանձնառութեամբ:
Այս վսեմ ձգտման մէջ ազգիս զաւակները միասնաբար դիմակայեցին բազում դժւարութիւնների ու նեղութիւնների, արձանագրեցին նշանակալի ձեռքբերումներ եւ առաջընթաց։ Այսօր նոր փորձութիւնների միջով է անցնում հայրենի մեր երկիրն ու ժողովուրդը․ բռնազաւթւած է Արցախը, տեղահանւած՝ Արցախի մեր զաւակները, եւ անկայուն է խաղաղութիւնը Հայաստանի սահմաններին։ Վերստին կանգնած ենք անվտանգային հիմնախնդիրների եւ նոր սպառնալիքների առջեւ։ Մեր պետութեան հզօրացման, արտաքին եւ ներքին մարտահրաւէրների դիմագրաւման համար հրամայական է Տէրունապատւէր սիրով միախորհուրդ ու միասնական լինելը, որպէսզի կարողանանք վերագտնել պանծալի յաղթանակների եւ յաջողութիւնների ուղին։
Արդ, արժեւորենք անկախ պետականութիւն ունենալու շնորհը եւ ամէնից վեր դասենք ազգային, պետական եւ համընդհանուր շահը։ Ապաւինած Աստծուն շենացնենք մեր երկիրը հաւատի, յոյսի եւ սիրոյ գործերի նոր վկայութիւններով եւ մեր նւիրեալ ջանքերով իրագործենք ազգային մեր իղձերը՝ արժանի դառնալով սաղմոսերգուի օրհնաբանութեանը. «Երանի այն ազգին, որի օգնականը Տէր Աստւած է» (Սաղմ. 32:12)։ Մեր հայցն է առ Բարձրեալն Աստւած, որ խաղաղ ու անվտանգ պահի հայրենի մեր երկիրը, մեր ժողովրդին առաջնորդի արդարութեան ու համերաշխութեան ուղիներով՝ ապահով ու բարօր կեանք պարգեւելով ազգիս ի հայրենիս եւ ի սփիւռս աշխարհի։
Շնորհք Տեառն մերոյ Յիսուսի Քրիստոսի եղիցին ընդ մեզ եւ ընդ ամենեսեան. ամէն: Օրհնութեամբ` ԳԱՐԵԳԻՆ Բ ԿԱԹՈՂԻԿՈՍ ԱՄԵՆԱՅՆ ՀԱՅՈՑ»,- ասւած է Վեհափառ Հայրապետի ուղերձում:
