Լիլիթ Գալստեան․ «Ազգի յիշողութիւնն ու արմատը ջնջելով՝ մարդուն դարձնում են մանկուրտ»
Շաբաթներ առաջ, երբ փորձեցի կրթութեան խնդիրների, 7-րդ դասարանի Հայոց պատմութեան դասագրքի վերաբերեալ մանկավարժական, ակադեմիական եւ հանրութեան բողոքի խօսքը փոխանցել ԿԳՄՍ նախարարին, ի պատասխան՝ շատ նախանձելի վստահութեամբ նախարարն արձագանգեց՝ համակերպւէք։ Այս մասին ԱԺ յայտարարութիւնների ժամին ասել է «Հայաստան» խմբակցութեան պատգամաւոր Լիլիթ Գալստեանը։
Պատգամաւորի խօսքով, դրան յաջորդել է տարբեր տրամաչափի իշխանական գործիչների հայրենասիրութիւնը, ազգային ինքնութիւնը եւ մեր անցեալը կասկածի տակ դնող եւ ծաղրող տեքստեր, այդ թւում՝ Հանրայինի եթերից։ «Անգամ փորձ արւեց գիտական քննադատութիւնը պիտակաւորել որպէս քաղաքական ռեւանշ»։
Գալստեանը հարց է բարձրացրել, թէ կարո՞ղ ենք իմանալ մասնագիտական ինչ փորձ եւ յանձնառութիւն ունի «Մասնակցային դպրոցի» կազմակերպութիւնը։
Անդրադառնալով գրական մի քանի ստեղծագործութիւն՝ Գալստեանը նշել է, որ ազգի յիշողութիւնն ու արմատը ջնջելով՝ մարդուն դարձնում են մանկուրտ եւ պատմութիւն խեղաթիւրւած դասագիրքը հէնց այս մասին է, որը պէտք է կասեցնել գիտութեան ուժով։
