Իշխան Սաղաթէլեան. «Ցեղասպանութեան յանցակից ՔՊ-ի հետ մենք չենք կարող կառուցողական երկխօսութիւն ունենալ»
MediaHub–ի հարցերին պատասխանել է ՀՅԴ Գերագոյն մարմնի ներկայացուցիչ, ԱԺ «Հայաստան» խմբակցութեան պատգամաւոր Իշխան Սաղաթէլեանը:
– Պարո՛ն Սաղաթէլեան, վերջին շրջանում իշխանութիւնն անընդհատ կառուցողական երկխօսութեան ու համերաշխութեան կոչ է անում։ Օրերս էլ Հայկ Կոնջորեանն ասաց, թէ Սէյրան Օհանեանն ասել է՝ ՀՀ Մրցակցութեան պաշտպանութեան յանձնաժողովի անդամի պաշտօնում առաջադրւած ընդդիմութեան թեկնածուն ՔՊ խմբակցութեան հետ հանդիպի: Ի՞նչ է սա նշանակում, արդեօք ընդդիմութիւնը պատրաստւո՞ւմ է կառուցողական դաշտում աշխատել իշխանութեան հետ:
– Արցախը թշնամուն յանձնած, Թուրքիայի եւ Ադրբեջանի կողմից իրականացւած ցեղասպանութեան յանցակից ուժերի, այն է՝ ՔՊ-ի հետ մենք չենք կարող կառուցողական երկխօսութեան մէջ մտնել։ Ես բացառում եմ այդ ուժի հետ կառուցողական երկխօսութիւնը, առաւել ես՝ համերաշխութիւնը, որովհետեւ իրենք մեր հայրենիքի մի մասը թշնամուն յանձնող, Հայաստանի ինքնիշխանութիւնը, տարածքային ամբողջականութիւնը հարցականի տակ դրած ուժ են:
Այո, երբեմն աշխատանքային անհրաժեշտութիւնից ելնելով ֆրակցիայի ղեկավարը կամ քարտուղարը ինչ-որ հարցով կոնտակտ պահում են, բայց ընդամէնն այդքանը, դրանից աւել բան չի կարող տեղի ունենալ, հետեւաբար՝ աւելորդ եւ անհիմն են խօսակցութիւնները, որ մեր մօտեցումներում հնարաւոր է փոփոխութիւններ տեղի ունենան:
