Արամ Ա կաթողիկոսը՝ ԱՄՆ Կոնգրեսում. «Յիշենք մեր աղօթքներում 100 հազար արցախահայերի, որոնք ստիպւած լքել են իրենց դարաւոր հայրենիքը»
«ԱԼԻՔ» – Մեծի Տանն Կիլիկիոյ կաթողիկոս Ն.Ս.Օ.Տ.Տ. Արամ Առաջինը կոնգրեսական Ադամ Շիֆի հրաւէրով եղել է ԱՄՆ Ներկայացուցիչների պալատում։ Նա հանդիպումներ է ունեցել Ներկայացուցիչների պալատի խօսնակ Մայք Ջոնսոնի, նախկին խօսնակ Նանսի Փելոսիի հետ, ԱՄՆ ղեկավարութեանը կոչ է արել աջակցել Արցախի 100 հազար հայ քրիստոնեայ փախստականներին։
Արամ Ա կաթողիկոսը բացման աղօթք է արել Ներկայացուցիչների պալատի նիստից առաջ:
«Օգնի՛ր մեզ, ողորմա՛ծ Աստւած, մեր աղօթքներում յիշի՛ր աւելի քան 100 հազար հայ փախստականներին, որոնք վերջերս ստիպւած էին լքել Արցախը, իրենց դարաւոր հայրենիքը»,- աղօթքում նշել է Վեհափառ Հայրապետը:
ԱՄՆ Հայ Դատի յանձնախումբը նշում է, որ իր կողմից կազմակերպւած ընդունելութեան ժամանակ Արամ Ա կաթողիկոսը հանդիպումներ է ունեցել նաեւ դեմոկրատական անդամ Քեթրին Քլարկի, Ջիմ Կոստայի, Աննա Էշուի, Եանգ Քիմի, Բարբարա Լիի, Բրեդ Շերմանի եւ այլոց հետ։ Նա նաեւ առանձին հանդիպում է ունեցել հանրապետական կոնգրեսական Ջերի Կառլի հետ։
Նշենք, որ Արամ Ա կաթողիկոսը երկշաբթեայ այցով է մեկնել ԱՄՆ։ Հայրապետական այցի ընթացքում հանդիպումներ են նախատեսւած Վաշինգտոնի, Ֆիլադելֆիայի, Նիւ Ջերսիի եւ Նիւ Եօրքի հայ համայնքների ներկայացուցիչների, թեմական, պետական եւ եկեղեցական պատասխանատու մարմինների հետ։
