Եւրոխորհրդարանի պատգամաւորը ԵՄ դիւանագիտութեան ղեկավարին կոչ է արել փոխել մօտեցումը Ուկրաինայում պատերազմի նկատմամբ
«ԱԼԻՔ» – Եւրոխորհրդարանի պատգամաւոր Ֆերնանդ Կարտհայզերը սոցիալական ցանցերում յայտնել է, որ ԵՄ դիւանագիտութեան ղեկավարին կոչ է արել փոխել իր դիւանագիտական մօտեցումը Ուկրաինայում պատերազմի նկատմամբ։
«Այսօր ես բաց նամակ եմ յղել Բարձրագոյն ներկայացուցիչ Կայա Կալասին եւ կիսւել եմ այն Եւրոխորհրդարանի իմ բոլոր գործընկերների հետ։ ԲՐԻԿՍ-Եւրոպա սիմպոզիումի համար Սոչի կատարած իմ այցից յետոյ, կարծում եմ, որ ԵՄ-ն շտապ կարիք ունի Ռուսաստանի եւ Ուկրաինայի միջեւ հակամարտութեանը նոր դիւանագիտական մօտեցման։ Իմ նամակում ես ուրւագծում եմ ութ սկզբունք՝ փակուղային վիճակից դէպի իրական խաղաղութիւն անցնելու համար.
Ռուսաստանի հետ երկխօսութեան վերսկսում, անվտանգութեան երաշխիքներ ԵԱՀԿ-ի գլխաւորութեամբ, փոքրամասնութիւնների եւ կրօնական ազատութիւնների պաշտպանութիւն, պայքար արմատական ազգայնականութեան դէմ, ԵՄ պրագմատիկ դիրքորոշում տարածքային ամբողջականութեան վերաբերեալ, իրատեսական անվտանգութեան միջոցառումներ Ուկրաինայի համար, յետպատերազմեան վերակառուցում, եւ դիւանագիտութիւն, որը թուլացնում է լարւածութիւնը, այլ ոչ թէ սնուցում այն։
Եւրոպան պէտք է դադարեցնի դէպի առճակատում սահելը եւ վերադառնայ դիւանագիտութիւն, ռեալիզմ եւ ինքնիշխանութիւն»,- գրել է Եւրոխորհրդարանի պատգամաւորը։
Կարտհայզերը, որը գլխաւորում է «Այլընտրանքային ժողովրդավարական բարեփոխումներ» կուսակցութիւնը, այս տարւայ մայիսին այցելել է Սոչի՝ Ռուսաստանի Պետդումայի հրաւէրով։
