Իսլ. յեղափոխութեան առաջնորդ. ««Նոր Մերձաւոր Արեւելք» ստեղծելու ԱՄՆ-ի ծրագրերը ձախողւել են»
«ԱԼԻՔ» – ԱՄՆ-ը չկարողացաւ կեանքի կոչել «Նոր Մերձաւոր Արեւելք» ստեղծելու եւ տարածաշրջանում իր քաղաքական նպատակներին հասնելու ծրագրերը։ Այս մասին երէկ՝ նոյեմբերի 29-ին «Բասիջ»-ի աշխարհազօրայինների հետ հանդիպման ժամանակ յայտարարել է Իսլ. յեղափոխութեան առաջնորդ այաթ. Սէյէդ Ալի Խամենէին:
Իր ելոյթում անդրադառնալով Մերձաւոր Արեւելքի հետ կապւած ԱՄՆ-ի ծրագրերին եւ հեռահար նպատակներին, այաթ. Խամենէին ասել է. «Նոր Մերձաւոր Արեւելք» ձեւաւորելու ԱՄՆ-ի ծրագրերը ձախողւեցին: Նրանք ծրագրում էին ոչնչացնել «Հեզբօլլահ»-ին, բայց հիմա այն 10 անգամ աւելի ուժեղ է։ Նրանց չյաջողւեց կլանել Իրաքն ու Սիրիան, եւ նրանք չկարողացան լուծել պաղեստինեան հակամարտութիւնը սիոնիստական ռեժիմի շահերին համապատասխան՝ օգտագործելով երկերեսանի՝ «երկու պետութիւնների» սկզբունքի վրայ հիմնւած նենգ լուծումը»:
Իսլ. յեղափոխութեան առաջնորդը պաղեստինեան դիմադրութեան «Ալ Աքսայի փոթրիկ» գործողութիւնը «պատմական իրադարձութիւն» է անւանել, որին յաջողւել է տարածաշրջանն «ապաամերիկանացնել»: ««Ալ Աքսայի փոթորիկ» պատմական իրադարձութիւնը սիոնիստական ռեժիմի դէմ է, բայց այն ապաամերիկանացրել է տարածաշրջանը:
Պատմութիւն կերտող այս իրադարձութիւնը կարողացաւ բառիս բուն իմաստով խանգարել ամերիկեան քաղաքականութեան սխեման այս տարածաշրջանում, եւ տայ Աստւած, որ այս փոթորիկը շարունակւի եւ իսպառ ոչնչացնի այդ սխեման»,- յայտնել է այաթ. Խամենէին:
Խօսելով պաղեստինեան հակամարտութեան կարգաւորման իրանական տարբերակի մասին, Իսլ. յեղափոխութեան առաջնորդը յստակեցրել է. «Իրանի Իսլամական Հանրապետութիւնը հաւատում է Պաղեստինում հանրաքւէին եւ ժողովրդի կարծիքին: Իսլամական Հանրապետութեան տեսակէտը սիոնիստներին եւ հրեաներին ծովը լցնելը չէ»:
